Inuit arlallit Europami kiarujussuarnerata kingunerisaanik toqusut

Inuit arlallit kiannerujussuata malitsigisaanik toqusimapput, innuttaasullu mianersornissaat oqartussat kaammattuutigaat.

Frankrigimi siullerpaamik 45 gradit qaangerlugit kiappoq. Tassami Frankrigip kujasissortaani Gallargues-le-Montueux-mi 45,9-mik kiakkami.

Innuttaasut mianersoqquneqarput:

- Kiarujussuarnerata nalaani toqusoqartarnera ajoraluartumik takornartaanngilaq, ministeriuneq Edouard Philippe ippassaq tallimanngornermi oqarpoq.

Frankrigimi ullumi arfininngornermi aamma kiangaatsiarnissaa, Frakrigimi silasiortut ilimasaarutigaat, 42 gradinik kiassinnaanissaa ilimasaarutigineqarluni.

Inuit 15.000-it kiarujussuarnerata malitsigisaanik 2003-mi toqummata, aarlerisaarutit nutaat Frankrigimi atuutilersinneqarput.

Kiarujussuarnerata mallitsigisaanik ukioq manna toqusut 2003-misulli amerlatigilerunanngillat, Italiamili, Frankrigimilu Tysklandimilu inuit arlallit toqoreerput, amerlanerit utoqqaallutik.

Angut 93-inik ukiulik Spaniap avannaani kiarujussuarnerata malitsigisaanik iluaallernermi kingorna toquvoq. Tamaani politiit taama nalunaaruteqarput.

Spaniap immikkoortuani Andalusiami angut inuusuttoq suli 20-liineqannngitsoq kiannera pissutigalugu uissanngulersimavoq, taamaalinerani nalunnguaariartorniarluni swimmingpooliliarsimavoq, tassanilu ilisimajunnaarsimalluni. Angut inuusuttoq taanna napparsimmavimmi kingorna toquvoq.