Inuit arfinillit aqqusinikkut ingerlaartillutik ajutoortut

Biilit marluk Nuummi Nuussuup Qinngorpullu akornanni ippassaq sisamanngornermi unnukkut aqqusinikkoortillutik siorpiamikkut aporlutik ajutoorput. 

Kalaallit Nunaanni Politiit pigaartuisa pisortaat, Carl Sværd, ullaaq manna taama ilisimatitsivoq.

Politiit biilinik aportoqarneranik unnukkut aqqaninngulersoq nalunaarfigineqareerlutik aqqusineq angallannermi ajutoorfiusoq matusimatereerlugu unnuaq marlunut qiteqquttoq ammaqqippaat. Angallannermi ajutoortut katillutik arfiniliusut ajoquserujussuarsimasortaqanngitsut, politiit pigaartuisa pisortaat oqarpoq.

- Taxartartoq arnaq ingerlaartilluni biilii siorpiaasigut aporneqarmata niua napivoq, ajutoortulli ajoquserujussuarsimasortaqanngillat, Carl Sværd oqarpoq.

Sukkaniunneq ajutoorutaasoq

Angut 20-nik ukiulik biilinik allanik apuisutut pasisaq inuusuttut sisamat allat ilaasoralugit biilertorlu alla sukkaniutsillutik biilinut allanut aporlutik ajutoorsimasut, politiit pigaartuisa pisortaat oqarpoq.

- Inuusuttut tallimat taakku biilertorlu alla sukkaniutsillutik ajutoortoqarpoq. Sukkaniuteqataasup aappaata biilii qanoq ittuunersut suli paasinngilarput, sukkaniuteqataasulli tamaasa kinaassusersereerpagut, Carl Sværd oqarpoq.

Sukkaniullutik biilertut aappaata sukkalisaarluni biilit allat saneqquteriaraluartillugit ajutoortoqartoq, politiit pigaartuisa pisortaata KNR-imut ullaaq manna uppernarsarpaa.

Ullup ingerlanerani killisiorneqassasut

Politiit ajutoornermik suliami ullumi misissuillutillu ilisimannittut taavalu ajutoortut arfiniliusut killisiussagitik, Carl Sværd ilisimatitsivoq. Angut 20-nik ukiulik biilinik apuisimasutut unnerluutigissangatikkitsik, taanna aamma oqarpoq. 

Politiit biilit sukkaniutaasimasut aappaat aamma suli ujarpaat.