Inuit angallataat arlaqartut aserorteriffigineqarlutillu tillinniarfigineqartut
Angallataatillit pingasut pingasunngornermi sisamanngornermilu ullaap tungaa Nuummi Nuussuup eqqaani umiarsualivimmi angallataatiminni tillinniartoqarsimaneranik aserorterisoqarsimaneranillu nalunaaruteqarput.
- Nuussuarmi inuit angallataataanni tillinniartoqarsimaneranik pingasunik nalunaaruteqarfigineqarpugut, taama Kalaallit Nunaanni Politiini pigaartut pisortaat Ole Hald sisamanngornermi ullaakkut ilisimatitsivoq.
Suliami susoqarsimanera politiinit maanna paasiniarneqaleruttortoq pigaartut pisortaat oqaluttuarpoq. Suliaq politiinit maluginiarneqalerpoq Nuummi umiarsualivimmi angallatit arlaqartut iserfigineqarsimanerat pillugu inuit internetsikkut attaveqaqatigiittarfiini oqaluttuat kaaviiaartinneqalermata.
Marlunngormalli angutit inuusuttut pingasut angallammik aallartut angallatillu arlaqartut iserfigineqarsimasut pillugit nalunaaruteqartoqarpoq.
Pinerluuteqarsimasutut pasisat
Pigaartut pisortaat sisamanngornermi ullaakkut ilisimatitsivoq, angutit inuusuttut pingasut taakku pasillernissaannut politiit immaqa tunngavissaqartut, oqaaseqarnerusinnaananili.
- Kikkut pinerluuteqarsimanersut erseqqissumik ilisimanngilarput, kisianni nukappiararujussuit imaluunniit angutit pingasut Nuussuarmi angallammik angalaqattaartut marlunngornermi unnukkut takuneqarsimapput, taakkulu oqaloqatigerusuttorujussuuagut, immaqa attuumassuteqarsinnaammata, Ole Hald oqarpoq.
Innuttaasunut taamaammat aamma ersarissumik innersuussuteqarpoq.
- Paasissutissaateqaruit politiit sulinerannut iluaqutaasinnaasunik tusarfigerusuttorujussuuatsigit. Kikkut tillinniartuusimanerat ilisimagukku, kisiannili aamma paasissutissaateqaruit pinerlunnermik paasinarsisitsisinnaasunik, pigaartut pisortaat oqarpoq.
Politiinut paasissutissaateqaruit attavigisinnaavatit 701448-mut
