Inuit 37-t Israelimiut Rafahmi saassussineranni toqutaasut

Gazap kujasissuani illoqarfik, Rafah, Israelimit sakkortuumik ataasinngornermut unnuaani saassunneqarpoq.

Ikiuiniaqatigiiffik Palæstinensisk Røde Halvmåne taama ilisimatitsivoq.

Inuit 37-t toqutaasimasut nalunaarutigineqarpoq, amerlasuullu allat aqqunatitersimallutik. Rafahmi peqqinnissaqarfik taama nalunaaruteqarpoq.

Paasissutissat saassussinermut tunngasut suli killeqartorujussuupput.

Illoqarfik qaartartumeerneqarmat uivernersuaqalersoq, tamaani najugallit nutaarsiassaqartitsivimmut Reutersimut oqaluttuaraat, innuttaasummi sininnerisa nalaanni saassussisoqarmat.

Muslimit qinuffii moskét marluk illullu assigiinngitsut saassussinerni eqqorneqartut innuttaasut oqaatigaat. Timmisartut, qamutit sorsuutit sakkutuullu imarsiortut umiarsuaat saassussinermi atorneqartut oqaatigineqarpoq.

Gazap kujasissuani ataasinngornermut unnuani nalunaaqutaq marluk missaanni saassussisimanertik Israelip illersornissaqarfiata nalunaarutigaa.

Tusarfiit nunanit tamalaaneersut oqarnerat naapertorlugu pingaartumik Rafahp nalaani ikiorsiinissamik pisariaqartitsilluinnartoqarpoq, Israelimmi Gazamik saassussilernerata kingunerisaanik Gazami innuttaasut amerlasuut Rafahp nalaanut qimaasimammata.

Palæstiinamiut sakkutuujunngitsut Rafahmi illersorneqartariaqartut Naalagaaffiit Peqatigiit kaammattuutigaat.