ASSIT Inuiattut ullorsiorneq Nuummi aallartimmat

Nuummi inuppassuit Nuutoqqami katersuupput. Qamutilittartoqareermallu puiseqqaanniunneq aallartinneqarpoq.

Tamatuma kingorna Kommuneqarfik Sermersuumi borgmesteri Charlotte Ludvigsen oqalugiarpoq:

- Inuiattut Nalliuttorsiorneq tassaavoq ulloq uanga inuttut qamuuna qujamasunnermik attortiffigisartagara. Maanna ukiut qulinngorput, Kommuneqarfik Sermersooq pilersinneqarmat assorsuarlu tulluusimaarutigaara ullumikkut uanga maani kangimut kitaanullu borgmesteritut nikorfasinnaagama. Maanna kangiata kitaatalu akornanni ataqatigiinneq pisariaqartipparput – ataqatigiinnerlu taanna tassaavoq pisuussupput naleqanngitsoq kisiannili taamaallaat piumagutta, atatigiinnerpullu paarilluarutsigu iperarnaversaarutsigulu sapinngilavut, piumasatta angunissaat sapinngilarput. Tassa taannaavoq siunissami tunngavissarput: Ataqatigiinneq, immitsinnut tapersersoqatigiinneq ikioqatigiinnerlu – ullut tamaasa.

- Tamannarpiaq anguniarlutigu nunatta aasarissua nalissaqanngitsoq takkutereertorlu nuannaarutigisigu. Taama ataqatigiitsiginerput pillugu aammalu inuiaqatigiittut nukittoorsuunerput nuannaarutigisigu. Uangami nuannaarutigeqaara tulluusimaarutigalugulu – ilissi peqatigalusi – nunap massuma ilaaniikkama.

Nunatsinni illoqarfiit pingaarnersaanni ukiut tamaasa pisartut aaqqissorneqarput, tassalu puiseqqaanniunneq, qaannamik takutitsinerit kiisalu meeqqanut ilaqutariinnullu aliikkutassaqartitsinerit assigiinngitsut.

Illoqarfigisanni nunaqarfigisanniluunniit inuiattut ullorsiornermi pisussat, kommunip nittartagaani atuarsinnnaavatit.