Inughuit ilisimasaat aningaasanngorluni tunissutitut uterpoq
![](/sites/default/files/styles/image_934x467/public/article_images/the_meaning_of_ice_jpg.jpg?itok=TXoTiiuO)
Atuagaq International Polar Institute Pressimit University Press of New England, USA-miittup ataani saqqummersitsisartuusumit 2013-imi saqqummersinneqarpoq.
Atuakkap piviusunngortinniarneqalerneraniilli pilersaarutaavoq tunisaaneranit sinneqartoorutit Avanersuarmiut, Alaskami Iñupiaat aammalu Canadami Nunavummiut meerartaannut inuusuttortaannullu utertinneqassasut.
AAMMA ATUARUK Imaata sikua suli pingaaruteqaqaaq
- Tunissutigisatta siuaasatta qangarsuaaniilli avatangiisitsinnut tunngassuteqartunik ilisimasaannik kinguaatsinnut ingerlatitseqqinnissanut atorneqarnissaat neriuutigaarput. Neriuutigaarput aningaasat piniartut meeqqanut pisuussutit uumassusillit Issittumilu uumaniarsinnaanermut tunngassuteqartutigut ilinniartitsisarnissaannut atorneqarlutik tapertaalaarsinnaanissaat.
- Inuusaaserput siuaasatsinniit ukiut tusindilippassuit ingerlanerini ilisimasanik ingerlatitseqqiisarnernik toqqammaveqartoq sakkortusiartortumik silap pissusiata allanngoriartorneranit minnerunngitsumillu nunarsuarmioqatitsinnit sunnerneqariartornitsinnit tatineqaraluttuinnarpoq, suleqatigiissitami siuliani eqqaaneqartumi suleqataasoq piniartorlu Mamarut Kristiansen Qaanaap Atuarfianut tunissuteqarnermi ilaatigut taama oqaaseqarpoq.
Atuakkiarsuarmut ”The Meaning of Ice”-mut peqqutaasoq tassaavoq Naalagaaffiit Peqatigiit Issittumi silap pissusiata allanngornerata kingunerinik nalunaarusiarsuat 2005-imeersoq ACIA nalunaarusiamik taaneqartartoq. Tassani nalunaarusioqataapput nunarsuarmit tamarmit ilisimatusartartut 300-nit ikinnerunngitsut, silap pissusianik ilisimasallit, ilisimatusartartut allat kiisalu nunap inoqqaavinut tunngassuteqartuni immikkut ilisimasallit.