Imaata sikua suli pingaaruteqaqaaq
![](/sites/default/files/styles/image_934x467/public/article_images/seaice.jpg?itok=fvJ-br-Y)
Atuagarsuaq nutaaq taaguutilik ”The Meaning of Ice” ippassigami saqqummersinneqarpoq. Tassani piniartut Qaanaameersut, Nunavummi Kangertugaapimmeersut aamma Alaskami Utqiarfimmeersut immap sikuanik ilisimasaminnik ingerlatitseqqinnerat sukumiilluinnartoq saqqummiunneqarpoq.
Ilisimasat piniartunit titartarneqarlutik taaguutaallu ilanngussorlugit paasissutissarpassuit akornanni ilaatigut qimerloorneqarsinnaapput.
Piniartut ilisimasaat ilisimatuussutsikkut tunngavilersorneqarlutik inuiaat pissusiannik piorsarsimassusiannillu ilisimatusartartunit, nunalerisunit sermilerisunillu arlalissuarnit, soorlu Canadameersumit Shari Fox Gearheardimit, USA-meersumit Henry Huntingtonimit nunatsinneersumit Lene Kielsen Holmimit, Qaanaameersumit Toku Oshimamit, allanillumi suliareqqinneqarlutik saqqummiunneqarput. Nunani pineqartuni tamani suleqatigiinnik pilersitsisoqarneratigut assersuutigalugu qimussit aqqutaat nunap assinginut ikkussorneqarput. Uumasut assigiinngitsut iluaqutigineqarnerat titartarneqarlutillu oqaluttuarineqarput aamma sikup pileriartortarnera nungujartortarneralu sammineqarlutik.
Atuagarsuarmi assitalersorluagaasumi maannaagallartorlu tuluttuinnaq saqqummersumi aamma sikumut taaguutit 70-init ikinnerunngitsut atuarneqarsinnaapput. Atuagaq kingusinnerusukkut kalaallisut, Inuktitut Inuppiatullu saqqummersinneqassasoq, Pinngortitaleriffimmit tusagassiuutinut nalunaarummi allapput.
Tunisaaneranit sinneqartoorutit piniartut peqatigiiffii atuarfiillu aqqutigalugit sumiiffiit pineqartut meerartaannut inuusuttaannullu tutsinneqassapput, avatangiisit pillugit ilisimasanik qanorlu atorneqarnissaannut piniartut ilitsersuinissaannut atugassanngortinneqassallutik.