Inuarsimasutut unnerluussaq ukiuni arfineq-pingasuni pineqaatissinneqarsimasunut inissiisarfimmiittussanngortinneqartoq
Nuummi Eqqartuussisoqarfik Sermersuumi angut 27-nik ukiulik pillugu eqqartuussissutigut suliaq ataasinngormat aallartimmat allagaq unnerluussut takisimavoq.
Unnerluussummi pissutsinut immikkoortut katillugit 20-iupput, immikkoortuni ilaatigut inuarneq, nakuuserneq, politiinut pineqaatissinneqarsimasunullu inissiisarfimmi sulisunut siorasaarisimaneq, tillinniarneq kiisalu tuniniaaqqinnissamik siunertaqarluni ikiaroornartunik paarisaqarsimaneq ilaatigut allassimapput.
Unnerluussutip unnerluussap ukiuni arfineq-pingasuni pineqaatissinneqarsimasunut inissiisarfimmiittussanngortinneqarnissaanik pingasunngormat eqqartuussut aamma inerneqartippaa.
Kalaallit Nunaanni Politiini unnerluussisussaatitaasuunerup, Lars Petersenip, eqqartuussut naammagisimaarpaa.
- Eqqartuussut naammagisimaarpara, soorunami suliaq taanna immikkut ittuuvoq pissutsinimmi arlalinnik imaqarmat. Aammattaaq pissutigalugu angut nakuuserfigineqartoq nakuuserfigineqarnermini kingorna toqummat unnerluussaq toqutsisimasutut unnerluutigineqarmat, Lars Petersen oqarpoq.
Unnerluutigineqartoq taamatut iliorsimasutut siornatigut pinngitsuunerarsinnarluni, pissutsit sinnerini 19-ini iliorsimasutut ilanngullugit, nassuerutigisimavai. Taamaasilluni qanoq sivisutigisumik pineqaatissinneqarsimasunut inissiisarfimmiitinneqarnissaa apeqqutaaginnalersimavoq.
Nalinginnaasumit sivisunermik pineqaatissinneqarsimasunut inissiisarfimmiittussanngortinneqartoq
Lars Petersenip oqarnera naapertorlugu inuarneq ukiunik arfineq-marlunnik pineqaatissinneqarsimasunut inissiisarfimmiittussanngortitsissutigineqartarpoq. Unnerluutigineqartup sukannerusumik pineqaatissinneqarneranut pissutaavoq pissutsini 19-ini allani aamma unnerluutigineqarnera kiisalu siornatigut pineqaatissinneqarnikuusimanera, unnerluussisoq taama ilisimatitsivoq.
Pineqaatissinneqarneranut sakkortusaataasoq, Lars Petersen naapertorlugu, tassaavoq maanna inissiisarfimmiittussanngortinneqartup siornatigut eqqartuunneqareernermini piffissap sivikitsup ingerlanerani pinerluttuliorsimanera.
