Pinerliisaqattaarsimasoq ataasinngorpat eqqartuussivimmi sassassasoq
Nuummi Eqqartuussisoqarfik Sermersuumi angut 27-nik ukiulik ataasinngorpat eqqartuunneqaleruni pissutsinut sorlernut unnerluutigineqarneranut allattorsimasut amerlapput.
Angut taanna ilaatigut toqutsisimasutut, nakuusersimasutut, politiinut pineqaatissinneqarsimasunullu inissiisarfimmi sulisunut siorasaarisimasutut, tillinniarsimasutut kiisalu tuniniaaqqinnissamik siunertaqarluni ikiaroornartunik paarisaqarsimaneranut unnerluutigineqarpoq, unnerluussummi taama allaqqavoq.
Toqutsisimaneranut unnerluutigineqarnera naapertorlugu angutip pineqartup angut alla niaquatigut ima sakkortutigisumik tukertarsimavaa allaat angut taanna ajoqusernerminit aaqqissimannginnini peqqutigalugu qaammatit arfineq-pingasut qaangiummata toqusimalluni.
Angutip piumasaqaatitaqanngitsumik katillugit ukiuni arfineq-pingasuni pineqaatissinneqarsimasunut inissiisarfimmiittussanngortinneqarnissaa suliami unnerluussisup ilaatigut piumasaqaatigaa.
”Utaqqigit, qilammukangajalerputit”
Angut taanna toqutsisimasutut unnerluutigineqarnerata saniatigut pissutsini 19-ini unnerluutigineqarpoq, ilaatigut politiinut pineqaatissinneqarsimasunullu inissiisarfimmi sulisunut siorasaarisimasutut unnerluutigineqarluni.
Angutip taassuma siorna februaarimi tigusarineqarnermi nalaani ilaatigut imangajak oqaaseqarsimavoq ”kammakka aggissapput”, ”kammalaatima pisariumaarpaasi” aamma ”utaqqigit, qilammukangajalerputit”, unnerluussut quppernerit qulit sinnerlugit takitigisup tamanna ersersippaa.
Angutip tuniniaaqqinnissamut siunertaqarneranik nalilerneqarsimasutut arlaleriarluni ikiaroornartunik paarisaqarsimanera kiisalu ingerlatsisinnaanermut allagartaqarani aalakoorluni biilersimanera pillugu eqqartuussiveqarfiup aamma aalajangiiffigissavaa.
Biilersimanerata ilaat Nuummi sullorsuarmi ajutoornermik kinguneqarsimavoq, tassani angutip politiit ajutoorneq pillugu ilisimatissimanngilai.
Piumasaqaatitaqanngitsumik katillugit ukiuni arfineq-pingasuni pineqaatissinneqarsimasunut inissiisarfimmiittussanngortinneqarnissaanut piumasaqaatigineqartup saniatigut ingerlatsisinnaanermut allagartaanik arsaarneqarnissaa kiisalu biilip ajutoornermik eqqugaasimasup inuttaa 40.000 koruuninik taarsiivigineqarnissaa unnerluussisussaatitaasut piumasaraat.
Pingasunngornermi aggustip 23-ianni Sermersuumi eqqartuussivimmi aalajangiisoqarnissaa naatsorsuutigineqarpoq.
