Internet ilinniarfinni atuarfinnilu atornerulertariaqarsoraa
Ilinniarfinni meeqqallu atuarfinni qarasaasiatigut atortorissaarutit nutarternissaat pisariaqalivissimavoq taakkuni internetimut attaviit assinik video-milluunniit tigusaqarnissat killilerujussuummata. Kaali Olsen Inuit Ataqatigiinneersoq isumaqarpoq tamanna maanna allanngortinneqartariaqalersoq.
Kaali Olsenip siunnersuutaa Inatsisartut ukiaanerani katersorneranni oqaluuserineqartussanngorpoq. Siunnersuummik saqqummiussiniarnermini aamma qissimingaarsimavai. EDB-mik atuinermut aningaasaliissutit ukiumut 10,4 millioner koruuninik amerlassuseqarput.
- Tele Greenlandip internetimik atuinermut akigititaasa annertussusaat pissutigalugu ilinniarfinni atuarfinnilu internetimik atuineq taamaallaat naqinnernik nassiussinermut aallernermullu killilerneqarsimavoq. Atuarfinni ilinniarfinnilu internetimi naapittarfinnik assigiinngitsunik atuisinnaaneq aamma killilerneqarsimavoq, Kaali Olsen siunnersuuteqarnermini tunngavilersuutimini allappoq.
Taanna taamaattumik isumaqarpoq kalaallit ilinniartut atuartullu ineriartornermut malinnaanissaminnut pitsaanerusumik periarfissinneqartariaqartut.
- Internet isummanik ineriartortitsinermut atorneqarsinnaavoq aammalu ungasianiit atuartitsinermut annertunerujartortumik atorneqarsinnaalluni, Kaali Olsen oqarpoq.
Siunnersuut oktoberip aqqaneq aappaanni Inatsisartuni oqaluuserineqassaaq.