Innuttaasut paasitinneqarnissaminnut utaqqisariaqartaqaat

Qaammatit marluk qaangiupput Paamiuni ilaqutariit Klemmensenikkut inigisaanni oqummik misissugassamik peersisoqarmat.

- Marlunnik sinittarfilinnik ineqarpugut, taava kujalleq oquppoq, oquttupilussuuvoq tipittupilussuulluni inigineqarsinnaanani. INI A/S-iminngaanniit pulaarteqaratta peersiffigivaa taava oqarput Danmarkimut aallartissavarput, taava kingornatigut tutsaqarumaarpugut qanoq iliuuseqarnissatsinnik. Taava tassa taamanikkullu utaqqivugut sulilu tutsaqarnatik.

Nakorsap allagaqaataani aamma ersarippoq ulorianaateqarnera pillugu allamut nuutsinneqartariaqartusi, qanoq sunniuteqarami ilissinnut?

Sunniutai arlalialuupput, soorlu niaqorluttarnerit kassutta nalaatigut taava aamma nuarujunnerit nalinginnaasorujussuupput uagutsinnut massakkut, soorlu qanittukkunaasiit nukarlersarput napparsimaqqammerpoq, nualluni siullulluni maqisoorpoq illuttut taava børneeksem aamma taanna aamma atuleramiuk nakorsamut takutittaraluarparput. Tarnutinik arlalialunnik kiisa aamma aqqusaagaqarpugut, kingullermik iluarsigaluarpoq massakkut taamaaleqqippoq. Tassa sunniutigisartagai ulluinnarsiutaannanngorput, tassa sapaatip akunneri tamaasa immaqa napparsimasoqartalerpugut meeqqatsinni sisamani, ajoraluartumik.

Sigurd Klemmensen taama oqarpoq. Taakku ernerat angajulleq astma bronkitisimik aamma nappaateqalersimavoq.

Ilaqutariit Klemmensenikkut nakorsamit pulaarneqareerlutik, peqqissusaat annilaanngatigalugu inissiaatileqatigiiffimmut decembarip ulluisa 14-ianni allagaqarpoq, ilaqutariit inissiamut allamut nuutinneqarnissaannik piumasaqaatitalimmik. Allakkat suli akineqarsimanngillat, nakorsallu allakkamini ilanngullugu oqaatigaa qaammatip ataatsip ingerlanerani susoqanngippat kommunimut peqqinnissamullu nakkutilliisumut suliaq ingerlateqqittariaqassallugu.

Svenskit ilisimatusartut paasisimavaat inissiani oquk ulorianartorujussuusoq, tassami oquup ulorianaataasa kræfteqalissutaasinnaanera 500-riaammik

annertunerusoq paasineqarsimammat.

A/S INI-mit oqaatigineqarpoq sapaatip akunneri sisamat arfinillillu akornanni misissugassanngorlugit Danmarkimut nassiussat akissutisiffigineqarnissaat utaqqineqartartoq.

Kalaallit Nunaanni inissiat illullu oqullit katillugit 185-it 2007-p naanerani nalunaarsorneqarsimapput.