Innuttaasut oqaluffimmut sapaatiniinnaanngitsoq orniguttalernissaat biskoppip neriuutigaa
Sapaatini nalliuttunilu naneruutit ikumasut takujuarsimassavatit sianaarpalaarlu tusaallugu. Illoqarfinni sisamani oqaluffiit meeqqanut maanna sammisassaqartitsinerusalissapput, inunnullu oqaloqateqarnissamik pisariaqartitsisunut periarfissaqarnerulissaaq. Oqaluffiimmi ulluinnarni aamma atorneqartalilerput.
Ilagiit inuiaqatigiinni nukittorsaataasumik tunniusseqataanissaat siunertaralugu ilagiinni ikiuineq aallartinneqartoq, biskoppi Paneeraq Siegstad Munk KNR-imut oqaluttuarpoq.
- Peqatigiiffiliussuugut illoqarfinni Ilulissat, Aasiaat, Sisimiut Nuullu taakkua aallartitaqassapput palaseqarfimmiit taavalu Hotel Sømaminngaanniit, biskoppi Paneeraq Siegstad Munk oqarpoq.
Taakkunani illoqarfinni sisamani sammisassanik aaqqissuussisoqartassaaq, soorlu toqusoornerup kinguneranik aliasuuteqartut oqaloqatiginnittarfii annertusarneqassapput, meeqqallu aasaanerani aallarsinnaanngitsut sammisassaqartinneqartassallutik.
Qaammammut ataasia nereqatigiinneq
Ilinniartut kisimiittut meerartallit qaammammut ataasia kalaaliminertoqatigiinnissamut qaaqquneqartassasut, oqaloqateqarnissamillu pisariaqartitsisut palasimik oqaloqateqarsinnasassasut, Paneraaq Siegstad Munkip ilanngullugu oqaluttuaraa.
- Aamma meeqqat biibilimut tunngasumik ilinniartinneqarnissaat aamma periarfissaassooq, taanna oqarpoq.
Suliniutit upernaaru aallartisarneqassasut
Suliniutit arlallit upernaaru aallartisarneqassapput. Oqaluffiillu sapaataannakkuunngitsoq atorluarneqarnerulernissaat sammisassaqartitsinerillu inoorusussusermik aamma pilersitsisarnissaat Paneeraq Siegstad Munkip neriuutigaa.
- Neriuppunga innuttaasut oqaluffiit sapaataannakkuunngitsoq kisianni aamma ulluinnarni atorluarnerulissangaat, biskoppi Paneeraq Siegstad Munk oqarpoq.
Kalaallit Nunaanni Ilagiit ilagiinnut ikiuinissamik annertusaanermi suliniut A.P. Møller Støttefondianit 6 millionit koruuninik tapiiffigineqartoq ukiuni pingasuni ingerlanneqassaaq.
