Inngilip Qernertup ammaqqinnissaa siuartikkusuppaat

Inngilip Qernertup ammaqqinnissaa aatsitassarsioqatigiiffiup Angus & Ross-ip piumasaraa. Misiligummik qillerereernermi kingorna paasineqarpoq aatsitassat 2 millioni tonsit suli piiarneqarsinnaassasut. Angus & Ross nalunaarusiaq ippassaq saqqummersippaat.

Aviisi Tuluit Nunaanneersoq The Yorkshire Post taama allappoq.

- Ujarassiuut sulilluarnerisigut naatsorsuutigisatsinnit marloriaammik annertutigisumik aatsitassaqartoq paasivarput, Angus & Ross-imi siulersuisut siulittaasuat Robin Andrews oqarpoq, nangillunilu:

- Tamanna pissutigalugu Inngilip Qernertup ammaqqinnissaa pissusissamisoorsoraara, Robin Andrews oqarpoq.

Aatsitassat pineqartut saniatigut saviminissamik peqartoq ilisimaneqareerpoq, Angus & Ross-ilu zink-imik, aqerlussamik, siilvimillu piianissaq siunertaralugu qilleriniarput. Aatsitassanik tamakkuninnga piianeq akilersinnaassasoq Angus & Ross-ip uppernarsisippaat, Inngilip Qernertullu ammaqqinneqarnissaa piumasaralugu.

Inngili Qernertoq 1973-imiit 1990-i ilanngullugu ammavoq, zink-imillu, aqerlussamillu, siilvissamillu piiaviusimalluni.