Innarluutilinnut sullissivittaaq qanoq ateqassava?
Innarluutilinnut sullissiviup nutaap Sisimiuni ukiaru ammartussap atsernissaanut Naalakkersuisut ikioqqupput. Isumaginninnermut naalakkersuisoq, Sara Olsvig taama oqarpoq.
- Inunnut innarluutilinnut sullissivissaq nuna tamakkerlugu sullissiviussaaq, sullissivillu inunnut innarluuteqartunut inuiaqatigiinnullu sullissisussaammat, Naalakkersuisut nunatsinni innuttaasut peqatiseraat sullissivissap nunatsinnut pingaaruteqartup atserneqarnissaanut.
Inunnut innarluutilinnut sullissiviup qanoq atserneqarsinnaaneranut siunnersuutissatsialammik peqaruit mailimut uunga nassiussissaatit: ipis@nanoq.gl imaluunniit uunga nassiullugu: Isumaginninnermut, Ilaqutariinnermut, Naligiissitaanermut Inatsisinullu Atuutsitsinermut Naalakkersuisoqarfik, Postboks 260, 3900 Nuuk. Siunnersuutit kingusinnerpaamik 16. maj tigoreersimassuagut.
Sullissivissap siunertaraa, innuttaasut innarluuteqartut inuunerinnerulernissaat kiisalu inuunerminni atukkatigut nalinginnaanerusumik inuiaqatigiinni akuusinnaanissaat suliffeqarfinnullu atassuteqarnermikkut periarfissaginnerulernissaat sulissutigissallugu.
Sullissiviup neqeroorutigissavai siunnersuineq, ilitsersuineq aammalu inunnut innarluuteqartunut sungiusaaneq. Sullissivik qanigisaasut inunnullu innarluutilinnut sullissisut aamma siunnersortarlugillu ilitsersortassavai.
