Innarluutilimmut anaanaq: Pissutsit taamaatsillugit uteqqinnavianngilagut
2019-imi marsi naalersoq ilaqutariit Petersen Enoksenikkut pingasunik meerartallit Nuummiit Danmarkimut nuupput. Nuunnerannut pissutaavoq ernertik Liam taamanikkut pingasunik ukioqartoq Angelman syndromimik, tassa inerikkiartornermigut kinguarsimasutut innarluuteqartoq paasigamikku.
-Kommunip tunniussassai annikikkamik, innarluutaalu naluneqarmat qanoq ikiorneqarsinnaanersoq naluneqarluni. Periarfissakippoq. Suut tamarmik ajornarput. Soorlu ikiorsiissutit, atortut, qinnutiginiarutsigit, aqquterujussuuvoq suna tamaat aqqusaaqqaarlugu aatsaat utaqqinangaatsiarsinnaalluni, Liamip arnaa Susanne Petersen KNR-imut oqarpoq.
Ilaqutariit qanoq iliuusissaarukkamik ernerallu ulloq unnuarlu nakkutigisassaammat Danmarkimut nuupput, ingerlaannarlutillu ikiorneqalernertik malugusuutigaat.
-Ikiorsiissuterpassuarnik peqarpoq, imaappoq atortussat, Liamip amigaatai. Atortussatsinnik amigaateqarutta sianeriaannaasarpugut. Aamma kommunimi siunnersorteqarpugut, aningaasatigut oqilisaaffigineqarpugut, angajoqqaatut tapersersorneqarpugut oqilisaanneqarluta, sapaatit akunneri tamaasa oqaloqatigineqartarluta, naatsumik oqaatigalugu sutigut tamatigut oqilisaanneqarluta.
Nunatsinnut uternissartik takorlooruminaatsikkaat
Kalaallit Danmarkimi najugallit nunatsinni inunngorsimasut 2023-mi 17.000-it sinnilaarpaat, politikerillu taakku nunatsinnut angerlaqqinnissaat orniginarnerulersikkusukkaat februaarip 22-ani sammivarput. Ilaqutariit Petersen Enoksenikkut angerlarsertaraluarlutik pissutsit taamaaginnassappata uternissartik takorlooruminaatsippaat.
-Nunatsinni innarluutillit taamatut atugaqartillugit angerlarnavianngilagut. Maani atugarissaartigaluta angajoqqaatut oqilisaaffigineqartilluta takorloorsinnaanngilarput angerlaqqinnissarput, Susanne Petersen oqarpoq.
Taanna politikerinut qineqqusaartunullu ima oqariartuuteqarusuppoq:
-Nunatsinni innarluutillit ikiorneqarnissaminnik annertuumik pisariaqartitsipput, taamaammat ikiorneqarluartariaqarput. Aamma angajoqqaat innarluutilinnik meerallit oqilisaallugit qasuersaartinneqartariaqarput. Aaqqitassarpassuit eqqarsaatigalugit sukaterisoqartariaqarpoq, Susanne Petersen naggasiivoq.
