Inissiat attartortakkat: Ukiumit nutaamit uumasuuteqarnermut malitassat imaapput

Naalakkersuisut pisortat inissiaataani attartortakkani uumasuuteqartarnermut malittarisassanut allannguutissatut siunnersuutaat Inatsisartut ukiaanerani ataatsimiinnerminni akuersissutigaat.

Taamaalilluni pisortat inissiaataanni attartortut januaarip aallaqqaataani uumasuuteqarsinnaalerput. Kisianni piumasaqaateqarpoq ilaatigullu aamma uumasuuteqarfioqqusaasoqarani.

KNR-imit nunatsinni pisortat inissiaataannik ingerlatsisut pingasut malitassat nutaat qanoq atuutsinniarneraat paasiniaavigaagut.

Inissiatileqatigiiffik INI, Namminersorlutik Oqartussat kommunillu inissiaataannik 9.000-nik allaffissornikkut ingerlatsisoq, ullumikkut qimmiuteqarfioqqusaananilu qitsuuteqarfioqqussaanngitsunik inissianik ingerlataqarpoq. Kisanni tamanna allanngortinneqalerpoq.

AAMMA ATUARUK Inissiani attartortakkani tamani uumasuuteqartoqarsinnaalilersoq

- Ukioq nutaaminngaanniit inatsisip allannguutissaa atuutilerpat uumasut pigineqartussat tamarmik piumasaqaatit pingasut inatsisip iluaniittut naammassineqarpata pigineqarsinnaalissapput, INI-mi tusagassiisartutut atorfilik, Birgithe Christensen, oqarpoq.

Piumasaqaatillu pingasut INI-p inissiani allaffissornikkut ingerlataani pineqartut tassaapput inissiat immikkoortortaqarfiini qimmiuteqarnissaq aamma qitsuuteqarnissaq akuerineqarsimassasoq, kommuunerisaminit taakkuninnga uumasuuteqarnissamut akuersissutaateqarnissaq kiisalu immikkut ittumik qaammatini pingasuni ineqarnermut akiliutip annertoqataanik qularnaveeqqutinik akiliuteqartoqarsimanissaa.

Illuut A/S-imi, 2018-ip naanerani inissianik nutaajunerusunik 770-inik pigisaqarfiullunilu allaffissornikkut ingerlatsiviusumi, maleruagassat allaanerungaassanngillat.

AAMMA ATUARUK Attartortoq qimmiutillillu uumasuuteqarnermut qularnaveeqqusiisarnissamut ingasaginnittoq

- Illuut A/S-imi attartortut inissiaqarfiit ilaanni sorlerni qimmiuteqarluni qitsuuteqartoqarsinnaanersoq taasinermikkut aalajangernikuuaat, Illuut Facebook-imi quppernermini allappoq.

Illuut A/S-imi attartortut qimmiuteqarniarunik imaluunniit qitsuuteqarniarunik aamma kommuunimit taakkunannga uumasuuteqarnissamut akuersissutaateqassapput, kiisalu aamma immikkut ittumik qaammatini pingasuni ineqarnermut akiliutip annertoqataanik qularnaveeqqutinik akiliuteqartoqarsimapput, soorlu aamma uumasuuteqarnissamut qinnuteqarnerminnut immikkut 300 koruuninik allaffissornermut matussutissanut akiliisussaatitaassasut.

Iserit A/S-imit, Kommuneqarfik Sermersuup kommunimini tamani inissiaataanik ingerlatsiffiusumi, inissiani uumasuuteqarsinnaanermut malittarisassat allanngortinneqarnerannut qanoq malitassaqartitsissanerlutik suli aalajangiussimanngilaat.