Inissiani attartortakkani tamani uumasuuteqartoqarsinnaalilersoq
Pisortat inissiaataanni ataatsimoorussanik isertarfilinni maannamut attartortut uumasuuteqarsinnaanerat inerteqqutaavoq. Tamannali ukiortaamit allanngortussanngorpoq.
Naalakkersuisummi pisortat inissiaataani attartortakkani uumasuuteqartarnermut malittarisassanut allannguutissatut siunnersuutaat Inatsisartunit sapaatip akunnerani uani marlunngornermi akuerineqarpoq.
AAMMA ATUARUK Inissiarsuarni uumasuuteqarneq inerteqqutaajunnaassasoq
Taamaalilluni pisortat inissiaataani attartortut januaarip aallaqqaatani 2020-imit inigisaminni uumasuuteqarsinnaalerput. Kisianni aamma tamanna piumasaqaateqarfiuvoq, taamatullu aamma itigartitsiviusinnaalluni.
Siullertut attartortut inigisaminni qimmiuteqarniartut imaluunniit qitsuuteqarniartut inissiamik attartulernerminni qularnaveeqqutinut akiliutigisimasamik saniatigut aamma immikkut ittumik qaammatini pingasuni ineqarnermut akiliutip annertoqataanik qularnaveeqqutinik akiliuteqartussaatitaassapput.
Immikkut ittumik qularnaveeqqutit Naalakkersuisut naapertorlugit inissiani uumasuutigineqartut aserfallassimasaannut aningaasartuutaasussanut atorneqartassapput, soorlu aamma inissiaq kumaajarneqartussanngussangaluarpat.
AAMMA ATUARUK Underskriftindsamling for kæledyr i lejeboliger
Kisianni immikkut ittunik qularnaveeqqusiisoqartartussaangaluartoq aamma najugaqatigiiffinni ataasiakkaani uumasuuteqartoqannginnissaa aalajangerneqarsinnaavoq.
- Tamatumani sapigaqartut allallu tamatuma akuerisaannginnissaanik kissaateqartut pisortat inissiaataanni attartortittakkami najugaqaannarnissamut periarfissaqarnissaat qulakkeerniarneqarpoq, taama immikkut aalajangersagaqarnissamut Naalakkersuisut inatsissatut allannguut, Inatsisartuni marlunnngornermi akuerineqartoq, siullermeerlugu saqqummiukkamikku tunngavilersuipput.
