Inissiarsuarni uumasuuteqarneq inerteqqutaajunnaassasoq
Qaqortumiu Otto Kielsen qitsuutini Nanu inissiami najugaqatigaa. Inissiarsuarnilu uumasuuteqarsinnaanerup inerteqqutaajunnaarsinnissaanik Inatsisartut aalajangiinerat tusaramiuk nuannaarutigaa.
- Arlallit qujamasuutiginguatsiaqaat taanna siunnersuutigisaat, Otto Kielsen oqarpoq.
Qitsunnillu nuannarisaqartup inissiarsuarni assersuutigalugu qitsunnik uumasuuteqarsinnaaneq akornutissaqarsorinngilaa.
Qimminilli qitsunnillu sapigaqartunik ersigisaqartunillu inoqarnera ilisimaalluarnerarpaa.
AAMMA ATUARUK Underskriftindsamling for kæledyr i lejeboliger
- Soorunami pulaartoqassagaangatta aperisarpagut. Taava sapinngisatsinnik qitsuit anisinniartarpagut, imaluunniit inigisatsinni qitsuup meqquiaasariaqartarpugut.
Inuillu ilaasa uumasuuteqarnissaq pinngitsoorsinnaajunnaarsimagaat Otto Kielsenip oqaatigaa.
- Aliikkutaalluartaqigamik uumasuuteqarluni qitsuit qimmillu. Aamma ilaasa kiserliornaveequtigisaramikku uumasuutitik.
Taamaammat inissiarsuarni qitsuit qimmillu inerteqqutigineqarunnaarpata affarleriit paaseqatigiisutigisinnaasassagaat qitsunnik nuannarisalik isumaqarpoq.
- Siunnersuinnarsinnaavakka inissiani najugaqartut paaseqatigiillutik oqaloqatigiillutillu paaseqatigiilluarlutillu uummasuutigineqarsinnaassasut, Otto Kielsen oqarpoq.
Inerteqquteqarnerup atorunnaarsinnissaanut inatsisissatut siunnersuumik Naalakkersuisut suliaqassapput, taannalu Inatsisartut aappaagu ukiaanerani ataatsimiinneranni taasissutigineqassaaq.