Attartortoq qimmiutillillu uumasuuteqarnermut qularnaveeqqusiisarnissamut ingasaginnittoq
(Naqqiut: Allaaserisami qimmit, qitsuit, marsvinit uumasullu allat attartornermut inatsisip allannguutaani nutaami ilaatinneqarput. Tamannali eqqortuunngilaq. INI-mit ilisimatitsissutigineqarpoq uumasut pineqartut tassaasut qimmit qitsuillu. Taakkua inigisani INI-ip allaffissornikkut ingerlataani uumasuutiginiaraanni akuersissummik aamma immikkut qularnaveeqqutinut akiliuteqarfiginissai piumasaqaataalissapput. Maannamullu tappiitsut, politiit aamma ilanngaaserisut qimmii kisimik inissiani INI-p allaffissornikkut aqutaani uumasuutigineqarsinnaatitaapput. Uumasut allat, soorlu kikkaasut, timmissat aalisakkallu ineqartillugit inissiani uumasuutigineqarsinnaanerannut akuerisaanerat allannguuteqanngilaq, aaqq.)
Pisortat inissiaataanni attartortakkani najugaqaruit, kiisalu januaarip aallaqqaataanit inigisarni qimmiuteqarusukkut imaluunniit qitsuuteqarusukkuit, taava immikkut ittumik qaammatini pingasuni ineqarnermut akiliutip annertoqataanik qularnaveeqqutinik akiliuteqarnissarnut maannamiit sipaalereertariaqassaatit.
Naalakkersuisut pisortat inissiaataani attartortakkani uumasuuteqartarnermut malittarisassanut allannguutissatut siunnersuutaat Inatsisartunit sapaatip akunnerani uani marlunngornermi akuerineqarpoq.
AAMMA ATUARUK Inissiani attartortakkani tamani uumasuuteqartoqarsinnaalilersoq
Tamannalu isumaqarpoq pisortat inissiaataanni attartortut - najugaqatigiiffinni ataasiakkaani uumasuuteqartoqarnissaa akuerineqarsimappat - inigisaminni januaarip aallaqqaataani uumasuuteqarsinnaalissasut. Kisianni qimmiuteqarniaraanni, qitsuuteqarniaraanni, marsviniuteqarniaraanii uumasulluunniit allat pigerusukkaanni, taava inimut iserternermi qularnaveeqqutitut akiliutigineqartut saniatigut immikkut ittumik qaammatini pingasuni ineqarnermut akiliutip annertoqataanik qularnaveeqqutinik akiliuteqartoqassaaq.
- Uummangaa taamaatoqarsinnaangilaq. Qanoq ililluta inuuniutissaqassagatta
inuuniarneq taama akisoreertigisoq. Ingasappallaaqaaq taamatorujussuaq qaffaasoqassaguni uumasuuteqarneq piinarlugu, Else Myry Qaqortumeersoq oqarpoq.
AAMMA ATUARUK Inissiarsuarni uumasuuteqarneq inerteqqutaajunnaassasoq
Taanna pisortat inissiaataanni attartortuuvoq qimmiuteqarlunilu. Aamma qimmiuteqarnissaminut akuerineqarsimavoq.
- Qimmiuteqarluni nuanneqigami aamma qiimmassaataaqigami, oqarpoq.
Else Myrylli qimmiuteqaqqissinnaanissani maanna qularutigileqqavaa.
-Tassa qimmiutitaaqissanngikkaluarpugut, taama akisussatigisoq, Else Myry oqarpoq.
Inissiani INI-mit ingerlatsinikkut isumagineqartuni uumasuuteqarnermut immikkut qularnaveeqqutit ataasiartumik akilerneqartarnissaat piumasarineqarpoq, taamaalilluni iserternermi qularnaveeqqutinut naafferarluni akilersorneqarsinnaassanngillat.
INI-mit KNR-imut ilisimatitsissutigineqarpoq inissiaatileqatigiiffiup suli nalilersorsimanngikkaa ullumikkut attartortooreersut uumasuuteqartullu aamma immikkut qularnaveeqqutinik akiliisinneqassanersut.
