Inissianut akiliutit pitsaassutsimut naleqqiullugit qaffasippallaaqaat

Tekla Broberg Aasianni najugaqarpoq, kiassarnerinnarmullu aningaasarpassuit ukiuni kingullerni atorsimavai.  

Taamaamat Jess Svanep inissiat attartortittakkat akiisa appartinneqarnissaannik piumasaqarnera taperserpaa.

-Nillertorujussuuvoq qiianarlunilu assut. Kiffiutissaqanngilaq silikuunilu atortorujussuullutigu, igalaanullu kiffiusersortariaqartarluta suerpallaarnera pissutigalugu. Taavalu sualuppoq sulaaq  decembarip januarillu 200 liiteri qaammammut amigartarpoq.

Aamma atuaruk Jess Svane: Ineqarneq akikinnerulissava? Aappi!

Tekla Broberg oqarpoq. Tamaamat inigisaminnut akiliutip appartinneqarnissaa kissaatigaa. 
Aappaattullu nunatsinnut naleqquttunik sanaartortoqartariaqartoq isumaqarpoq.
Inissianillu attartortut pitsaanerusumik atugaqalequllugit,
suleqatigiinnerulernissaq neriuutigaa.

Inissiaatileqatigiiffik A/S Ini, atuisut Naalakkersuisullu imminnut ikioqatigiillutik immersoqatigiinnissaat, Tekla Brobergip kissaatigalugu. Inigisat suerpallaarnerat sulaamik atuivallaartitsisartoq ajornartorsiutaasoq A/S Inimit Naalakkersuisuniillu eqqumaffigineqarnerusariaqartoq oqaatigalugu.  

A/S Inip isornartorsiummut akissutaa

Tekla Brobergip isornartorsiutai pillugit A/S Inimi tusagassiinermut pisortaq Else Løvstrøm KNR-imut oqarpoq, inissiat qanoq issusaat pillugit inisiaatileqatigiiffiup nakkutilliisuisa ukiut tamasa nalunaarusiarisaraat, nalunaarusiallu piginnitunut apuunneqartartut. Tassalu inissiat qanoq oqorsagaanerat ussisusaannullu tunngasut Aasianni Wille Brandip Aqqisernani inissianik piginnittunit, tassalu Namminersorlutik Oqartussat ilisimaarigaat, taassuma oqaatigaa.