Inissiani ajuissuni najugalippassuupput
![](/sites/default/files/styles/image_934x467/public/article_images/blok_14_-2_0.jpg?itok=9dpMK2p7)
- Isummat ataatsimoorfigisinnaasavut avissaartuuffigisinnaasatsinnut naleqqiullugit amerlanerujussuupput. Annertoorujussuarmik massakkut iliuuseqartoqalissasoq taamaammat qularutiginngilara. Iliuuseqarluta ukioq manna aallartareerpugut, inissiallu siuissami pitsaanerulernissaat qularutiginngilara, Ineqarnermut naalakkersuisoq Jens B. Frederiksen oqarpoq.
Ineqarnermi pissutsit atuuttut Nunatsinni isumannaannerussappata ineqarnermut akit qaffanneqartariaqartut, partiit tunngaviusumik isumaqatigaat, aningaasat aserfallatsaaliinermut atorneqassallutik.
Demokraatit isumaqarput inigisanut akiliutit piviusorsiunngitsumik appasitsinnerisigut attartortut sumiginnarneqarsimasut.
- Akiliutit appasikkaluarput, sumulli iluaqutaava inissiat ima ajortigippata allaat peqqinnissamut sunniuteqarnerlullutik ukiumilu qiiatilluta, Demokraatit aperipput.
Inigisamut akit qaffanneqarpata aningaasat aserfallatsaaliinissamut atorneqarsinnaassasut, Demokraatit isumaqarput, akerlianilli aamma oqaatigaat inissiat iluarsaanneqarpata nutaanillu sanaartortoqarpat kiassarnermut imermullu akiliutit appassasut, inissiat ussissarluarneqarsimassammata.
Akissaatikinnerillu naammaginartumik inuussutissaqaannarnissaat anguniarlugu inimut akiliummut tapeeriaaseq misissoqqissaarneqartariaqartoq, Demokraatit aamma isumaqarput.
Tapiisarnermut aaqqissuussinerup 20/20/60-imik taaguutillip siunissami atorunnaarsinneqarnissaa Inuit Ataqatigiit kissaatigaat, pisortat pissaqarnerusunut tapiissuteqartarneranik taagamikku, soorlu aamma inissiaateqartut ilaat akornanni niueqatigiinnermik equsoortitsinerusutut nalileraat.
Demokraatit siunnersuutigaat namminerisamik illuliornermi nammineerluni akiliutissaq 20 procentiussasoq, Danmarkimisullu realkreditikkut aningaasaliineq 80 procentiussasoq.
20/20/60-imilli taallugu tapeeriaatsip atorunnaarsinneqarnissaanut siunnersuut Siumumit ilalerneqanngilaq.
Ineqarnerli pillugu naalakkersuinikkut ingerlatsinermut nassuiaat partiinit ataatsimut isigalugu iluarisimaarneqarpoq, kisitsisilli nalunaarusiamiittut, aalajangiinissamullu ilaatigut tunngaviliisussat, Siumumit ilaatigut apeqquserneqarput.
Kisitsisit illoqarfinneersut ilaat kukkunertaqartut, Siumup oqaaseqartuata Kim Kielsenip oqaatigaa.
- Naatsorsueriaatsit assiigiinngitsut atorlugit kisitsisit immaqa saqqummiunneqarnikuupput, assiliarlu taamaalilluni allatut isikkoqalerluni, Kim Kielsen oqarpoq.
Kisitsisit taamatut atorneqartut siunissaq eqqarsaatigalugu sunniuteqarsinnaappat?
- Kisitsisit Inatsisartunut saqqummiunneqartut pingaaruteqartutut Siumuminngaanniit soorunami isigivavut, eqqortuunissaallu naatsorsuutigisarparput. Tassami ineqarnermik imminut pilersorsinnaasut 700-t missaanniittut aallaqqaammut oqaatigineqarpoq, kinguninnguatigullu 500-t missaanniilerlutik, naak amerlasoorpassuit pisariaqartitsisut ilisimaneqaraluartoq miserratigisinnaanngikkipput. Kisitsisilli eqqortut suunersut soqutiginassaaq. Aningaasaleeriaatsitsinnut tunngatillugu aaqqiiniarsinnaassagatta, Kim Kielsen naggasiilluni oqarpoq.