Ingerlatseqatigiiffiit akileraarutaat appartillugu
Kalaallit Nunaanni ingerlatseqatigiiffiit akileraarutaat maannakkorpiaq suliffeqarfinnut nalinginnaasunut 31,8 %-iuvoq suliffeqarfinnullu aatsitassat pillugit inatsisip ataaniittunut 30 %-iulluni. EU-mi agguaqatigiissillugu 23,5 %-iusumit qaffasinnerungaatsiarluni, aamma Danmarkimi ingerlatseqatigiiffiit akileraarutaat 25 %-iusoq nunatsinnit appasinneruvoq.
-Demokraatini isumaqarpugut suliffeqarfiit namminersortut taakkuusut aningaasarsiornikkut namminersulernissatsinnut tunngavissiisussat kingornalu namminersulivinnissatsinnut. Taamaattumik inuutissarsiortut namminersortut nukittorsartariaqartut Demokraatini isumaqarpugut. Ingerlatseqatigiiffiit akileraarutaat apparutsigut suliffiit pioreersut unammillersinnaassusaat periarfissaallu pitsanngorsassavagut. Suliffiit periarfississavagut patajaallisarnissaannut, ineriartornissaannut nutaaliornissaannullu aamma minnerunngitsumik aningaasaleerusussusaat uummarissassavarput. Piffissaq qaninnerusoq isigalugu tamatuma kinguneranik suliffiit amerlanerit pilersinneqassapput taamaalioruttalu inuiaqatigiit ataatsimoortumik aningaasarsiornerat annertusassavarput, Anda Uldum, Demokraatini aningaasaqarneq pillugu oqaaseqartartuusoq isumaqarpoq.
Suliniutinut angisuunut atatillugu nunatta isertitassaasa annerpaartaat ingerlatseqatigiiffiit akileraarutaannit pissarsiarineqartussatut naatsorsuutigineqarput, taannalu 30 %-init 25 %-inut appartinneqarpat namminersorlutik oqartussat isertitaat susassaqarfimmi tassani 17 %-ingajannik appassapput.
-Ingerlatseqatigiiffiit akileraarutaannit isertitat ikilinissaat ilisimaarivara, aallaqqaammulli susassaqarfimmi tassani ingerlatseqatigiiffinnik pilersitsiortornerit qanoq ingerlassanersut utaqqimaaqqaartariaqarparput. Susassaqarfimmimi nutaanik suliniteqarnissatsinnut periarfissaqarpugut, taamaaliunnginnitsinnili eqqarsaqqaarluartariaqarpugut. Isumatusaartumik iliortoqartariaqarpoq, Anda Uldum knr.gl-imut oqarpoq.
Siumut qangali kissaatigisaatut siunissami royaltieseqalersinnaanera Anda Uldumip tunuartikkusunngilaa, suliniutilli angisuut siulliit misilittagaqarfigilersinnagit siunissami aaqqiissutissanik aalajangersimasunik toqqaareerusunngilaq.
