Inersimasut atornerlunneqarsimasut ikiornerseqarnissaat Siumumit ujartorneqarpoq
![](/sites/default/files/styles/image_934x467/public/article_images/haender_4_0.jpg?itok=FOiQEyYd)
Siunnersuut Aleqa Hammondimit Juliane Henningsenimillu, Inuit Ataqatigiinneersumit, 2009-mi saqqummiunneqartoq pillugu naalakkersuisut aatsaat iliuuseqarnialernerat Siumup siulittaasuata Aleqa Hammondip tupigilluinnarpaa.
- Naalakkersuisut aatsaat ippassaq suliakkerneqanngillat, 2009-mili suliakkerneqareerput, Aleqa Hammond oqarpoq.
Inersimasut meeraallutik kinguaassiutimikkut atornerlunneqartarsimasut ikiorserneqartarnissaat pitsaanerusoq anguniarlugu Naalakkersusisut ippassaq suliakkerneqarput.
Isumaginninnermut Naalakkersuisup siunnersuuteqartumut akissuteqarnermini oqaatigaa, suleqatigiisitamik alloriarnertut siullertut pilersitsiniarluni, taassumalu suliassarissagaa katsorsaaviit pitsaanerusut anguniarlugit politikkikkut qanoq iliuusissanik innersuussuteqarnissaq.
Naalakkersuisup suleqatigiisitamik pilersitsinissaminik neriorsuinera 2009-mi siunnersuuteqartup aappaata, Juliane Henningsenip iluaraa:
- Suleqatigiisitamut ilaasortat, pikkorissut inuiaqatigiillu qanoq issusaannik ilisimasaqarluartut suliakkerneqarnerat uanga nammineerlunga iluarisimaarpara, Juliane Henningsen oqarpoq.
2009-mi Inatsisartut tamarmik isumaqatigiillutik inersimasunut katsorsaaviliornissaq Naalakkersuisunut suliakkiissutigaat.
- Soormi taamanili isumaqataassutaareersoq aallaqqaataaniik suliarineqalissava? Aleqa Hammond oqarpoq nangillunilu.
- Erseqqissaassutigissallugu pingaaruteqarpoq, Juliane Henningsenip uangalu 2009-mili siunnersuuteqarnitsinni Naalakkersuisut suliakkerneqareermata, kinguaassiutitigut atornerlunneqarsimasunut katsorsaavimmik pilersitsissasut, Aleqa Hammond oqarpoq.
Suliap aatsaallooqqinnera iluarinagu Inatsisartuni illuatungiliuttut Isumaginninnermut Naalakkersuuisumut tatiginninnginnermik taasisitsigaluarput. Tamannali Inatsisartuni amerlanerussuteqartut taasinermikkut pinngitsoortippaat.
Taamaakkaluartoq Inuit Ataqatigiinnit siunnersuuteqartup, Juliane Henningsenip ippassaq oqallisigineqartup inernera naammagisimaarpaa.
- Katsorsaaviliornissap aallartisarneqarnissaa, tassa suleqatigiisitamik pilersitsisoqarnera Naalakkersuisunit maanna neriorsuutigineqartoq nuannaarutigaara. Inuit Ataqatigiit Isumaginninneq pillugu oqaaseqartartuat, Juliane Henningsen taama oqarpoq.