Ineqarnermut tapiissutit angerlarsimaffeqanngitsunut ajornartorsiortitsipput

Ullumikkut inissaaleqileraanni ineqarnermut tapit inissaqaqqilernissamut aporfiulersinnaapput. Inisimasoqaleraannimi ineqanermut tapiissutit annaaneqarsinnapput.

- Angerlarsimaffeqanngitsoq ilaquttamini ikinngutiminiluunniit inisisimasuutillugu, inissiami najugaqartup inigisamut tapiissutisiarisartagaa annaaneqartarpoq, inisimasuusorlu anisinneqartariaqartarpoq angerlarsiffeeruteqqillunilu.

Knud Erik Hansen oqarpoq. Taassuma Hans Thor Andersen aamma Paarnannguaq Andersen suleqatigalugit, angerlarsimaffeqanngitsuuneq pillugu nalunaarusiorput, Nammisorlutik Oqartussat Aalborg Universitet suleqatigiinnerisigut tamanna pisinnaalersimalluni.

Inigisanut tapiissutit pillugit peqqussut angerlarsimaffeqanngitsunut paasiuminaassinnaasarpoq, taakkuami sumiiffigisinnaasaminnik ernummateqartaramik.

Inigsanut tapiissutit pillugit peqqussuteqarneq pissutaalluni angerlarsimaffeqanngitsut inisimaffigisaminnit anisitaasariaqartarnerat angerlarsimafeqanngitsunut paasiunaasinnaasarpoq, Knud Erik Hansen oqarpoq.

Inigisanut tapiissutit tunniunneqartarnerat nalilersoqqinneqartussaavoq tamannalu avaqqunneqarsinnaanngilaq, tassungalu tunngasortaa ilanngunneqassaaq, ilaqutariinnermut Naalakkersuisoq Martha Lund Olsen oqarpoq,

- Pisortanit ikiorsiissutinik pisartagaqartut inisimasorineqalerpata, taakkua inissiamut akiliutigineqartartunut sunniuteqartussaavoq, suliffissaaleqisoq inisimasorineqarsinnaavoq allatigulluunniit inigisanut tapiissutinik annaasaqarnermik kinguneqarsinnaalluni, tassa tamakkua annerusumik misissuifigineqassapput, Martha Lund Olsen oqarpoq.

Ilaqutariit inigisaminnit anisitaasimasut qaammatit pingasut qaangiukkaanga allamut inissinneqarallartanerannut periuserineqartoq ajornartorsiutaasoq Knud Erik Hansen-ip tikkuarpaa.

- Angerlarsimaffeqanngitsut sumiiffissaqalertarput, kiattumi, imeqarfiusumi igaffimmillu igasinnaalerlutik, arlaatigullu sumiiffisaminnik qulakkeerneqarlutik.

Taamaakkaluartoq inissinneqarallartartut atugaat imaannaanngitsuusarpoq.

Inigisamit anisitaanerup kingorna aningaasartuutinik annertuunik kinguneqartarnera nalunaarusiami ilanngunneqarpoq.

Inigisaminnit anisitaasimasut inigisaminnut akiliinatik sivisuumik inigisaminni najugaqartinneqarsinnaasarput.

Uanilu ajortumik kinguneqartunik ikiorsiisoqartarpoq, anisitaasummi akiitsui 100.000it tikillugit annertussuseqalertarput.

Inigisamut akiliutinik akiliineq ajoraanni anisitaasussanngoraannilu tamanna piaartumik pisaruni ajunnginnerussaaq, taava akiitsut amerlavallaalertinnagit akilerneqarsinnaaniassamata, Knud Erik Hansen oqarpoq.