Indiami nuna sisoormat inuit 44-nit ikinnerunngitsut ajunaartut
Indiap kimmut kujasissuani nunap immikkoortuani Keralami Wayanadip immikkoortuani nuna sisoormat inuit 44-nit ikinnerunngitsut ajunaarput.
Kerala sinnerlugu Indiap inatsisartuini ilaasortat ilaat nutaarsiassaqartitsivimmut Reutersimut taama ilisimatitsivoq.
Ajunaarsimasutut nalunaarsorneqartut marlunngornermi ullaakkut amerliartupallapput, amerlanerunissaallu ernummatigineqarpoq. Inuit hunnorujulikkuutaat marullummit illuniillu nakkaannikunit matoorussaasimanissaat ernummatigineqarpoq.
Indiamiut sakkutuui 200-t sinnerlugit, Keralap upalungaarsimasui oqartussaasuilu annaassiniarnermi ikiorpaat.
Ikaartarfiilli pingaaruteqartut ilaat ajalusoorsimammat annaassiniarneq ajornartoorfiuvoq. Nutaarsiassaqartitsivik AFP taama allaaserisaqarpoq.
Nunap sisoorfiata nalaa ujaqqanik, marullummik imermillu ulikkaarpoq, annaassiniartartullu sumiiffinnut assigiinngitsunut apuunniapiloortarlutik.
Indiap ministeriunerata Narendra Modip inoqatinut attaveqaqatigiittarfikkut X-ikkut allaaserisaa naapertorlugu Keralami oqartussat sutigut tamatigut ikiorniarneqarput.
