Indiami killilersuinerit sivitsorneqartut
Indiami 1,3 milliardit missaannik innuttaqartumi coronavirusip siaruatsaaliornissaanut nuna tamakkerlugu killilersuinerit maajip ulluisa pingajuata tungaanut sivitsorneqarput. Ministeriuneq Narendra Modi taama nalunaaruteqarpoq.
Naak inuit millionilikkaat suliffeerussimagaluartut naalagaaffimmiillu ikiorserneqanngikkaluartut taama aalajangiineq attanneqarpoq.
- Aningaasaqarneq eqqarsaatigissagutsigu pilliuteqangaatsiarpugut. Inuulli inuunera naleqarnerpaartaavoq, Modi oqarpoq.
Ministeriunerup oqarnera naapertorlugu ulluni kingullerni ilorraap tungaanut ingerlanertik uppernarsarsinnaavaa.
Asiap kujataatungaani inuit tunillatsissimasut amerleriarujussuaqqinngitsut kisitsisit takutippaat. Indiami inuit coronavirusimik tunillatsissimasut 10.000-it missaanniipput, taakkunannga 339-it coronamik toqquteqarsimasutut nalunaarutigineqarnikuupput.