Qulaarpaa Inatsisit tunngaviusut pisoqalisoorutigineqarlutik ajornartorsiutaalersinnaasut
Nunatta inatsisissai tunngaviusut Danmarkimi inatsisit tunngaviusut avataaniittussaapput. Tamanna pissutsinik ajornannginnerulersitsissaaq, tunngaviusumilli inatsisit suli atuutilersinneqaratik pisoqalisimaratarsinnaapput atuutilersinneqannginnerinilu nutarteqqaartariaqaratarsinnaassallutik, inatsisit tunngaviusut pillugit immikkut ilisimasalik Ilisimatusarfimmeersoq, Jens Wendel-Hansen, taama oqarpoq.
- Taamaaliornissamullu killilersugaannginnerusumik inissisimaneq iluaqutaassaaq, immikkut ilisimasalik oqarpoq.
Aaqqiissutissaq pisariunngitsoq
Inatsisit tunngaviusut Kalaallit Nunaannut namminiilivissimasumut atuuttussaapput, taamaammat Danmarkimi inatsisit tunngaviusut iluaniissinnaanissaat ernumassutigineqartariaqanngilaq.
- Kalaallit Nunaannummi taamanikkussamut atuukkunnaarsimassaaq Kalaallit Nunaat namminiilivissimassammat, Wendel-Hansen taama oqarpoq.
AAMMA ATUARUK Namminiilivissagutta ilinniartariaqartugut
Taamaammat Kalaallit Nunaanni inatsisinik tunngaviusunik suliaqarnermut Danmark akuliutinngilaq, taakku Danmarkimi inatsisit tunngaviusut avataanniimmata.
Pisoqalisoorutigineqarsinnaasoq
Ajoqutissartaali tassaavoq pissutsit maannakkutut isikkoqartillugit Kalaallit Nunaata namminiilivinnissaanut piffissaq sivisussagunarmat.
- Taamaattoqarneranilu inatsisit tunngaviusut ukiut qulikkuutaat matuma siorna suliaqarineqartut pigineqassapput, inuiaqatigiit allanngorsimallutik, taamaattumillu inatsisit tunngaviusut piffissamut naleqqukkunnaarsimasinnaassallutik, immikkut ilisimasalik oqarpoq.
AAMMA ATUARUK Namminiilivinnissaq unammillernartoqartoq
Taamaammat inatsisit tunngaviusut ullumikkut suliarineqartut Kalaallit Nunaat Danmarkimit avissaarnissaminut piareerpat taamanikkussamut inuiaqatigiiusunut naleqqukkunnaarsimasinnaassapput.
- Tamannalu ajoqutaasinnaavoq. Ajoqutaanerali ima angitigissanngilaq naleqqussaasoqarsinnaanani, toqqaannartumilli atuutilersinneqarsinnaassagunanngilaq, Jens Wendel-Hansen taama naliliivoq.
Inatsisit katersornissaat periarfissaasoq
Akerlianilli aamma Danmarkimi inatsisit tunngaviusut killiliussaasa iluanni inatsisinik tunngaviusunik suliaqaannartoqarsinnaavoq.
- Iluaqutissartarissavaa inatsisit tunngaviusut oqaasertaat pigineqartut katersorneqarsinnaassammata, adjunkt Wendel-Hansen taama oqarpoq.
Kalaallit Nunaannullu makkuussaapput; Danmarkimi inatsisit tunngaviusut, Kalaallit Nunaanni namminersorneq pillugu inatsit Naalakkersuisullu katitigaanerannut tunngatillugu inatsisit. Ima paasillugu, inatsisit Kalaallit Nunaanni naalakkersuinikkut aaqqissuussaanermut malittarisassat tamaasa. Taakku inatsisinngorlugit katersorneqarsinnaapput.
AAMMA ATUARUK Oruluallaarneq namminiilivinnissamut aqqutissaanngilaq
Taamaaliornikkut inatsisitigut allannguutinik anginerusunik kinguneqassanngilaq.
- Tassaassaaq allagaammut pingaarnermut katersorneqarnerat.
Anguniakkat killiliussanut naapertuutissapput
Taamaattorli Nunatsinni inatsisinut tunngaviusunut tunngatillugu naalakkersuinikkut anguniakkat Danmarkimi inatsisini tunngaviusuni killiliussanut naapertuutinngerartarsinnaapput.
- Taamaalisoqarneranilu Savalimmiut ajornartorsiutigisaata assinga aporfiussaaq, tassalu inatsisit tunngaviusut pillugit siunnersuut danskit inatsisinik atortitsinermut ministereqarfianit itigartitsissutigineqarluni, Jens Wendel-Hansen Ilisimatusarfimmeersoq taama oqarpoq.