Politikki Inuussutissarsiutit

Inatsisissatut siunnersuut suliffeqarfiit akisunaarsinnaavaat

Tamanut takussaasumi ussassaarisarneq pinngitsoorani kalaallisut pisassasoq Naalakkersuisunit Inatsisartunut inatsisissatut siunnersuutiginialersaarneqarpoq.

Allattoq Mads Pedersen, Sara K. Jakobsen

januaarip 09-at 2015 17:02

Tamanna suliffeqarfinnit assigiinngitsunik qisuariarfigineqarpoq.

Ilai oqarput inatsisinngussagaluarpat suliffeqarfimminnut sunniateqassanngitsoq, ilaalli oqarput akisusinnaasoq.

Tamanut takussaasumi ussassaarisarneq pinngitsoorani kalaallisut pisassasoq inatsisissatut siunnersuutiginiarneqalersaartoq, maanna tusarniaassutigineqarpoq.

KNR-imiillu pingitsoorani kalaallisut ussassaarisarnissaq pillugu pisiniarfiit suliffeqarfiillu assigiinngitsut tusarniaavigaagut.

Maaniitsumi atisaarniarfimmit Rita Sport-imit inatsisissatut siunnersuutissaq piviusunngussagaluarpat pisiniarfimmut sunniuteqarnavianngitsoq oqaatigineqarpoq. Tassami Rita Sport pingaarnertut kalaallisut attaveqartuummat qaqutiguinnarlu qallunaatut ussassaarusiortarluni.

Aamma atuaruk Oqaatsit pillugit inatsisissatut siunnersuut ernummatigineqartoq

Taamatuttaaq Kalaallit Nunaanni Brugseni inatsit oqaatsinut tunngasoq pivisunngussagaluarpat aporfiunavianngitsoq, Brugsenimi attaveqatigiinnermi sulisoq, Irene Jeppson, oqarpoq. Oqaatigalugulu Brugsenip ussassaarutai kalaallisut qallunaatullu suliarineqartareermata allanngortoqarnavianngitsoq.

Ussassaarusiorfik Deluxus Studio aamma ernumassuteqanngilaq. Tassani piginnittoq Lars Andersen oqarpoq, nammineq nunagisami oqaaserisat pingaarnerutinnisai pissusissamisuuginnartut, naatsorsuutiginngilaalu ussassaarutinik sanatitsisartut ikilissasut.

Suliffeqarfiit allat minnerusut KNR-imit attaveqarfigaagut, taakku maanna qallunaatuinnaq naqitatigut ussassaarillutillu neqeroorusiortarput, tamanit paasineqarsinnaasoq naatsorsuutigigamikku. Inatsilli pineqartoq piviusunngussagaluarpat oqaatsit marluk atortalissagunikkit akisunaarsinnaallugu oqaatigaat.

Tamanut takussaasumi ussassaarisarneq pinngitsoorani kalaallisut pisassasoq Naalakkersuisunit Inatsisartunut inatsisissatut siunnersuutiginialersaarneqartoq januarip 15-iata tungaanut Niuernermut Naalakkersuisoqarfimmit tusarniaassutigineqassaaq.

Kalaallisut ussassaarinerup saniatigut oqaatsit allat atorneqarsinnaapput.