Oqaatsit pillugit inatsisissatut siunnersuut ernummatigineqartoq

Tamanut takussaasumi ussassaarisarneq pinngitsoorani kalaallisut pisassasoq Niuernermut naalakkersuisup Inatsisartunut inatsisissatut siunnersuutiginialersaarpaa.

Siunnersuut piviusunngussappat pisortat namminersortullu nioqqutissanik sullissinissanillu ussassaariniarunik tamanna pinngitsoorani kalaallisut pissasoq inatsisaalissaaq.

Taama siunnersuuteqarnermi atuisartut pisisartullu illersorneqarnerat qulakkeerniarneqarpoq.

Tuniniaanissamik nittarsaassineq aamma nalunaaqutsersuineq pillugu Inatsisartut inatsisaattut siunnersuummi, maanna tusarniaassutigineqaleruttortumi, pinngitsoorani kalaallisut ussassaarisalernissaq pingaarnertut allannguutaavoq.

Tamannalu Nunatsinni naqitanik aviisiliortut annersaanni, Sermitsiaq/AG-mi kingunerlutsitsisinnaavoq.

Sermitsiaq/AG-mi ussassaarinermut akisussaasoq, Lasse Christensen oqarpoq, inatsisissatut siunnersuutigineqartoq piviusunngussappat tamanna tusagassiorfimmut kingunerlussinnaasoq.

- Tamassuma ernumanartortarisinnaavaa, ussassaarutinit isertitagut eqqornerlunneqarnissarput, Lasse Christensen radio aviisimut oqarpoq.

Ussassaarisartut amerlanerit kalaallisut qallunaatullu ussassaarisarput. Suliffeqarfiilli minnerit aningaasassaqannginneq pissutigalugu qallunaatuinnaq ussassaarisinnaasarput, taakkulu annaaneqaratarsinnaasut, Lasse Christensen isumaqarpoq.

Pinngitsoorani kalaallisut ussassaarinerup saniatigut oqaatsit allat atorlugit ussassaarisoqarsinnaassasoq, Naalakkersuisut inatsississatut siunnersuutaanni aamma allaqqavoq.

Inatsisissaq piviusunngussappat, assersuutigalugu naqitani ussassaarutinut inissanik pisisartut oqaatsit marluk atorlugit ussassaariniarunik, inissamik annermik pisisariaqartitsilersinnaapput, tamassumalu akisunerulersinnaanera, Lasse Christensenip ernumagaa.

- Ussassaarutinut inissanik tuniniaasunut tamanna ajorpoq. Aningaasanik atorfinnillu annaasaaqaatigisinnaavarput, Lasse Christensen oqarpoq.

Ussassaarutinik inissanik pisisartut oqaatsit marluk atorlugit inissanik annerusunik pisisalissappata, tamanna aviisini naqitani iluaqutaassanersoq, Lasse Christensenimut apeqqutigaarput, taannalu ima akivoq.

- Nunatsinni aningaasaqarneq ingerlanerliorpoq. Taamaattumik suliffeqarfiit ussassaarutinut aningaasartuutitik amerlissagaat upperinngilara, Lasse Christensen oqarpoq.