Inatsisartut meeqqat inuusuttullu pingaartillugit oqaluuseraat
Inatsisartut ullumi ataatsimiinneranni aqqanermut aallartittumi oqaluuserisassat pingaartumik meeqqanut inuusuttullu atugaannut tunngassuteqarput.
Meeqqanut akilersuutit meeravissiartaarnermilu tapiissutit 1994-mili qaffanneqarsimanngitsut, qaaffaavigineqarnissaanik siunnersuut, inatsisartuni ullumi eqqartorneqassaaq.
Meeqqanut ulloq unnuarlu inissiisarfinniittunut aammalu meeqqat angajoqqaarsianiitinneqartunut atisarsiutissat kaasarfimmiullu qaffanneqarnissaannik siunnersuut, inatsisartuni ullumi oqaluuserissavaat.
Kommunit meeqqanik inuusuttuaqqanillu ulloq unnuarlu inissiisarfinnut namminersortunut inissiigaangata, aningaasartuutaasunut Namminersornerullutik Oqartussat kommunellu avitseqatigiillutik aningaasartuuteqartalernissaat aamma siunnersuutigineqarpoq.
Tamakku saniatigut atuartut iliniartitsisullu peqanngittarnerat qanoq annertutiginersoq, kiisalu tamanut saqqummiunneqartalernissaa, inatsisartuni aamma oqallisigineqassapput.
