Inatsisartut katersornerat ullumi aallartissaaq
Suliassammi oqimaatsut inatsisissanik nutaanik kinguneqarnavianngillat, suliniutinulli nunatsinnut pingaaruteqartussanut nassuiaatit sukumiisut saqqummiussuunneqassapput.
Tassa inatsisissat aaqqiissutissallu pilersinneqannginnerini sukumiisumik oqallisigineqaqqaassapput.
Ove Karl Berthelsen aatsitassarsiorfissarsuit pillugit nassuiaateqassaaq, tassanilu sulisussat nunanit allaneersut akissarsiassaat sulinermilu atugarisassaat pillugit oqallittoqangaatsiarnissaa naatsorsuutigineqassalluni.
Jens B. Frederiksen ineqarniarneq pillugu tamatuma saniatigut nassuiaateqarpat nunatsinni inissiat isasuulivissut qanoq-iliuuseqarfigineqassanersut akissuteqarfigisussaassallugit.
Palle Christiansenip ilinniartitaanerup pitsanngorsaaviginiarneqarneranut atatillugu suleriusissaq aamma nassuiaateqarfigissavaa, tassalu Ilisimatusarfiup marluinnut agguluttorneqarnissaanik siunnersuutaa illersorniartussaassallugu.
