Inatsisartut kalaallisuinnaq oqalulissappata akisunaarneqarsinnaavoq

Kalaallisuinnaq oqaluttarfimmit saqqummiisarnissaq pivusunngussagaluarpat, inuit 15.000-it tungaannut amerlassusillit politikkikkut oqallinnernut mattussaasinnaasut, Oqaasileriffimmi siunnersortip, Per Langgårdip oqaatigaa.

Kalaallisuinnaq Inatsisartut oqaluttarfiannit saqqummiisarnissamik qineqqusaarut, Inatsisartunut qineqqusaartut ilaannit aamma isornartorsiorneqarpoq.

- Kalaaliullunga qallunaatuinnarlu oqalullunga Inatsisartuni oqaaseqarsinnaatitaassanngikkuma demokratii tunngavigalugu pisinnaatitaaffiiagaassaanga, taama isumaqarpoq, Demokraatit sinnerlugit Inatsisartunut qineqqusaartoq, Jeanette Holding.

Partii Inuit qineqqusaarutaa imaaliallaannaq piviusunngortinneqarsinnaassagunanngilaq. Siullermik, politikerit kalaallit qallunaatuinnaq oqaaseqartut saqqummiisinnaassanngippata, tamanna inuit pisinnaatitaaffiinik unioqqutitsinerussaaq.

Aappassaanillu Inatsisartuni oqaluttarfimmit kalaallisuinnaq saqqummiisarnissaq imaaliallaannaq anguneqarsinnaanngitsoq, Oqaasileriffimmi siunnersortaanerup, Per Langgårdip oqaatigaa. Taanna nangilluni oqarpoq kalaallisuinnaq oqaluttoqarnissaa anguniarniarneqassappat inuiaqatigiinnut tamanna akisuupilussuussasoq.

- Oqaruma akisussasoq aningaasat kisiisa eqqarsaatiginngilakka. Isummersortarnertigut aamma tamanna akisunaarsinnaavarput, tassami ukiuni maanna 60-inngulersuni naliginnaalernikuuvoq kalaallit marluinnik oqaaseqartuuneri aamma naliginnaasutut isigaarput qallunaat qallunaatuinnaq oqaluttarneri, Per Langgård oqarpoq.

- Pingaartorujussuuvoq oqaatigissallugu, Ilinniarfissuarmi takornartat oqaasiisut ilinniartitsineq ilinniartitsisunngornianut ilinniartitsissutigineqarsimanngimmat, Per Langgård oqarpoq.

Inatsisartunut qineqqusaartut ilaat, Jeanette Holding kalaaliuvoq qallunaatuinnaq oqaluttoq. Taanna ukiorpassuarni kalaallisut oqalunnermut ilinniarsimavoq.

- Kalaallisut paasinittarnera oqalussinnaaninnit pitsaanerujussuuvoq. Nalunngilarali Nunatsinniittoqartoq uannit ajornartorsiornerujussuarnik aamma inuusuttortatta akornanni. Tassalu taakku eqqarsaatigineqarnerusariaqakkavut, Demokraatit sinnerlugit Inatsisartunut qineqqusaartoq, Jeanette Holding oqarpoq.

Partii Inuit kalaallisuinnaq oqaloqqusineri Jeanette Holdingip immikkoortitsinerut isigaa, tassami inuit ataasiakkaat pisinnaatitaaffiiagaannerannik tamanna kinguneqarsinnaasorigamiuk.

- Kalaallit Nunaanni marluinnik oqaaseqarpugut aamma Inatsisartut ataatsimiittarfianni. Tamanna attatiinnarneqassaaq demokraatiskiusumik Nunatta ingerlatiinnarnissaa qulakkiissagutsigu, Jeanette Holding taama naggasiivoq.