Inatsisartut ilaasa puigukkatik nassiuppaat
![](/sites/default/files/styles/image_934x467/public/article_images/2014.12.11_-_15239.jpg?itok=5qICrdA5)
Maanna Inatsisartuni ilaasortat sisamaannaat nalunaarsukkami nassiunnissaat amigaatigilerpaat.
Radioaviisimit sapaatip akunnera kingulleq oqaluttuaraarput inatsisartunit ilaasortanit 31-usunit arfineq pingasut atuuffitik inatsisartoqarfimmut nalunaarutigisimanngikkaat, naak upernaami ataatsimiinnermi inatsisartut suleriaasiat nutaaq akuerineqareeraluartoq.
Inatsisip allanngortinneqarnera isumaqarpoq Inatsisartuni ilaasortat atuuffitik aningaasatigullu soqutigisatik pillugit nalunaarsuummik tunniussisalissasut.
Aamma atuaruk Politikerit inatsisitigut piumasaqaat puigoraat
Radioaviisilli amigaataasut partiinut apeqqutigereeraallu Siumumit ilaasortat sisamat ulapissimapput sapaatillu akunnerata kingulliup naanerani nalunaarsuiffik nassiussimavaat.
- Siumumiit ilaasortaq ataaseq paasissutissat nutaanngitsut kisiisa tunniunnikuusimallugit paasivaa, maannalu nutartersimalerput, Inatsisartoqarfimmiit nalunaarutigineqarpoq.
Taamaalilluni Inatsisartut pillugit paasissutissat tamangajaasa innuttaasunit Inatsisartut nittartagaanni takuneqarsinnaalerput.
Tassami imaappoq, Jess Svane Siumumit kisimiilluni, Partii Naleqqamilu ilaasortat tamarmiusut pingasut suli nalunaarsugartik tunniutinngilaat.
Partii Naleqqamiillut partiip allattoqarfiani sulisoqannginnera utoqqatsissutigaat, siumumiillu nassiussinissap puigorneqarsimanera tunngavigineqarluni.