Inatsisartut ataatsimiinnissaat neriulluarfigineqarpoq
Inatsisartut upernaami ataatsimiinneranni siunnersuutit sanaartornermut, inuiaqatigiinni ajornartorsiutit, meeqqanut atugassarititaasut kiisalu aalisarnermut inatsimmut tungasunut pineqartillugit suleqatigiittoqarluarsinnaassasoq, illuatungiliuttut naalakkersuisooqatigiillu partiivisa annerpaat marluk ilimagilluinnarpaat.
Assersuutigalugu Nunatsinni ajornartorsiutaasut angisuut Inatsisartunut ilaasortat ataatsimiittarfimmi ataatsimiitsitalianilu ataatsimoorfigissagaat, Siumup politikikkut oqaaseqartartua neriuppoq:
- Inunnit isumaginnittoqarnermi nalunngilarput nunarput ajornartorsiortoq. Assigiinngitsunik ajornartorsiutinik piusunik peqarpugut soorlu atornerluinerit allallu. Amerlasoorujussuupput taassumap iluani, isumaqarpunga tamatsinnut naaperiaanermik annertuumik nassataqarfiussasoq, Suka K. Frederiksen Siumut sinnerlugu politikikkut oqaaseqartartuat oqarpoq.
Inuit ataqatigiit siulittaasuata tulliata Aqqaluaq B. Egedep suleqatigiissutigisinnaasatut takorluugai aamma arlaqarput.
- Suleqatigiiffigineqarsinnaasut tassaasorinarput takornariaqarnikkut siunissami pilersaaruteqarnissaq periuuseqarnissarlu. Inuussutissarsiornikkut aamma aatsitassarsiornerup qanoq nunatsinnut atugassaqarfiunissaa qanutullu suliniarfigineqarnissaa. Taavalu aamma akileraartarnikkut inuillu atugaatigut oqilisaassiniarnermi siunertat oqallisiginissaanut.
Neriunnerinnaanngilarli
Naalakkersuisoqatigiit Illua tungiliuttullu aamma aporaattarnissaat, Inuit Ataqatigiit politikkikkut oqaaseqartartuata Naaja Nathanielsenip ilimagilluinarpaa.
Naalakkersuisut Illua tungiliulittullu imminnut suli ungasippallaartut, Aqqaluaq B. Egedep eqqaasitsissutigaa:
- Isumaqarpunga ullumikkutut ingerlarusaarneq isumaqataanngiffigisassarigipput uagut illuatungiliuttut. Taamaammat siunissami pilersaarusiornikkut aammalu immaqa isumaqatigiinngiffigut aqqutingalugit naalakkersuinikkut ingerlatsiniarnerup qimanneqarnissaa, tassa taannaavoq isumaqatigiilernissamut aqqutissaq.
Suka K. Frederiksenili aaqqissuusseqqinnissat pillugit naapeqatigiittoqarsinnaaneranut isumalluarneruvoq.
- Maannakkut ima eqqarsarpunga ajunngitsortai annerusumik Siumumiit suleqataaffigisinnaasagut isigisariaqaripput sulilu inissinnerusariaqarparput aamma naaperiaasinnaanerput immitsinnut assigiinngissuserput nukittoqqutitut saatsillugu ingerlatissallugu, Inatsisartuni ilaasortani nutaajunerpaaq siullerpaamik inatsisartunut oktobarimi qinigaasoq Suka K. Frederiksen oqarpoq.
