Akisussaaffiup tiguneqarnissaata isummerfiginissaa Inatsisartut kinguartikkaat
Siunnersuut pilersaarut malillugu upernaami ataatsimiinnermi maajip 18-iani oqallisigisussaagaluarpaat. Aamma siunnersuut suliffimmi avatangiisinut akisussaaffiup akisussaaffigineqalerneratigut atuutilersussaq inatsit nutaaq maajip 29-ani inaarutaasumik taasissutigineqartussaagaluarpoq.
Inatsisartut nalunaarusiap saqqummersinneqarnissaanut kinguartsitsinerannut pissutaatippaa 2015-imi Aqqaluaq B. Egede-p nalunaarusiamik sanasoqarnissaanik.
Taamaalilluni oqartussaaffiiit nunatsinnut nuunneqarpata ilisimaneqarsinaaqqullugu oqartussaaffiit aalajangersimasut qanorpiaq sinaakkutisaqartut, aamma aningaasaqarnikkut qanoq nunatsinnut pisussaaffiliinersut.
Inuussutissarsiornermut Aatsitassaqarnermullu ataatsimiititaliami sulittaasoq Peter Olsen taama oqarpoq.
AAMMA ATUARUK Sulisoqarneq upernaakkut ataatsimiinnermi qitiussaaq
- Taava taanna saqqummereeriarpat taanna qimerlooriarutsigu taava taamaalilluta isummerfigisinnaanngussagatsigu taakku oqaluuserisassat, Inuussutissarsiornermut Aatsitassaqarnermullu ataatsimiititaliami sulittaasoq Peter Olsen taama oqarpoq.
Nalunaarusiaq kingusinnerpaamik 2018-mi saqqummiuneqarnissaa naatsorsuutigineqarpoq.
Demokraatit nuannaartut
Siunnersuulli Demokraatinit Atassummiillu isornartorsiorneqarpoq, taakkumi isumaqarput suliffimmi avatangiisinut akisussaaffiup tiguneqarnera akisuallaassasoq, tassami naatsorsuinerit takutippaat 10 millionit koruunit missaannik ukiumut naleqassasoq.
Aningaasartuutit taakku danskinit maannakkut akilerneqartarput.
- Nunaarutigisorujussuuarput, aamma uagut oqariartuutiginikuugatsigu pitsaanerusoq kingunissai paasilluaqqaarlugit aamma siunnersuutip itigartinneqarnissaa innersuussutiginikuugatsigu taamaammat uatsinnut nuannersorujussuuvoq kinguartinneqarnera tusarlugu, Evaldsen oqarpoq.
Sulisitsisut siunnersuummik aamma isornartorsiuinikuupput, taakkulu Namminersorlutik Oqartussat suliassaqarfinnut allanut aningaasanik pingaarnersiuisariaqarsoraat.
Suliffimmi avatangiisinut akisussaaffiup nunatsinnit akisussaaffiginerulernissaa Naalakkersuisunit kissaatigaat. Akisussaaffinnik angerlaassinissamut siunnersuuteqartuuvoq Naalakkersuisoq Vittus Qujaukitsoq.
