Inatsisartunut ullumikkut qinersisoqartussaavoq
Pappiaqqallu taasivissat 43.000-it taasiartorfinnut anngunnissaat suliassangaatsiaasimavoq. Pappiaqqat taasivissat assersuutigalugu Kujataani nunaqarfimmut Narsaq Kujallermut avannaanilu Savissivimmut anngunnissaat suliassarujussuusimalluni.
Tele-Postip tamanna isumagisimavaa, pappiaqqallu taasivissat Savissivimmut tallimanngormat suli anngussimanngillat. Air Greenlandilli Pituffimmi stationslederia Peter Lillie biilerluni pappiaqqat taasivissat Pituffimmit 35 kilometerit ingerlaareerluni amerikamiut campiannut Camp Tutomut arfininngormat assartorpai. Piniartoq Savissivimmiu Markus Hansen tassani naapippaa. Markus Hansen pappiaqqat taasivissat qimussimut useriarlugit sermersuakkoorullugit 150 kilometerit ingerlaareerluni Savissivimmut apuuppai. Savissivimmi qinersisinnaatitaasut 30-t 40-llu akornanniittut taamaasillutik qinersisinnaalerput.
Pappiaqqat taasivissat qinersivinnut apuunnnissaat Kujataani aamma suliassaangaatsiarsimavoq.
Silap ajornera pissutaalluni unammillernartoqarsimavoq. Silammi ajornera pissutaalluni qulimiguullit atorneqarsinnaasimanngillat. Taarsiullugu nassiussat Royal Arctic Linep sumiiffimmi umiarsuaanut pajuttaammukaanneqarput, pappiaqqallu taasivissat nunami taasivissat kujasinnerpaartaanut sapaammi apriilip ulluisa 22-anni aqqusaarunneqarsinnaasimallutik.
Pappiaqqallu taasivissat qinersivinnut katillugit 72-inut maanna tassa apuunneqarsimalerput, qinersisinnaatitaasullu qinersinissaannut piareersimallutik. Qinersilluarisi!
