Inatsisartunut ilaasortanut inissiat suliariumannittussarsiuunneqartut
Namminersorlutik Oqartussat inissiaatileqatigiiffiat Illuut sinnerlugu sanaartortoqarnissaanut pilersaarut Qarsoq Tegnstuep suliariumannittussarsiuuppaa.
Pilersaarutip Inatsisartuni ilaasortat Nuummut ataatsimiigiarneranut inissaqartitsisassapput.
Inatsisartunut ilaasortat ullumikkut inissiani attartukkani ineqartartut siunissami inissiani nutaani najugaqartalissapput.
AAMMA ATUARUK Assiliartalersugaq: Inatsisartut inissiassaat ima ilisimasaqarfigaagut
Suliariumannittussarsiuunneqartoq naapertorlugu najugaqarfiusartussani inissiat 25-upput, tassani ineqarfinni tallimanut agguataarneqarsimasuni ataatsimik ataatsimoortarfeqarluni.
Sanaartorneqartussat ataatsimoortillugu 2200 m2-imik angissuseqarpoq. Sanaaartornissamut pilersaarut naapertorlugu sanaartorneq 2022-mi naammassineqassaaq.
Pilersaarut oqallisaaqisoq
Pilersaarut Suleqatigiissitsisunit ilaatigut isornartorsiorneqarpoq, taakku isumaqarput naak inissiarpassuit aserorteraluartut nutartigassaangaatsiaraluartullu politikerit inissianik nutaanik sanaartornikkut immikkut pingaarnersiortut.
Inatsisartunili siulittaasup Inatsisartunut ilaasortat ataatsimiinnissaannut inissaqartitsinissamut inissianik attartormut aningaasartuuteqartoqartarmat inissiat nutaat Nunatta Karsianut sipaaruteqartitsissasut nalilerpaa.
AAMMA ATUARUK Inatsisartut prioriterer sig selv igen
Inatsisartut siulittaasuata oqarnera naapertorlugu Inatsisartunut ilaasortat inissiani nutaani attartornermut ukiumut 3,9 millionit koruuneertarnissaat missiliorneqarpoq. Inatsisartut inissiat inissiaatileqatigiiffimmit Illuummit ukiuni 30-ni taamaatinneqarsinnaanngitsumik attartussavai.
Aningaasanut inatsit naapertorlugu attartornerrmut akiliutit Illuut A/S-ip illuliortitsinermini akiitsorilikkaminut tarsersugaanut, ernianut taavalu ingerlatsinermut aningaasartuutaanut aningaasalersuutaassapput.
AAMMA ATUARUK Nye boliger vil sikre bedre deltagelse i samlingerne
