Assi: Nils Baum/Bureau for Inatsisartut

Inatsisartuni ullormut pisussat

Inatsisartuni ullormut oqaluuserisassat sisamaannarnik immikkoortortaqarput, tamarmillu apeqquteqaat aallaavigalugu oqallinnissamik siunnersuutaallutik.

Partii Naleqqameersup Anthon Frederiksenip meeqqerivinni meeraaqqerivinnilu pisortat allaffissornikkut akisussaaffiinik oqilisaassinissamik siunnersuuteqarpoq.

Taanna isumaqarpoq pisortat allaffissornerujussuarmik suliaqarnerat pissutigalugu meeqqanut perorsaanikkut
inerikkiartuutaasunik suliassanut peqataanissaannut ajornakusoortitsisoq.

Immikkoortut aappaattut ikiaroornartoq hashi oqaluuserineqassaq.

Attaviitsup Naaja Nathanielsenip Inuit Ataqatigiinneersullu Agathe Fontainip meeqqat inuusuttullu akornanni hashimik imigassamillu atornerluinerup qanoq iliornikkut unitsinneqarsinnaanera oqallisigitikkusuppaat.

Meeqqat inuusuttullu atornerluisut katsorsarneqarsinnaanerisa qularnaveeqquserneqarnissaanik siunnersuuteqarput, atornerluisuunerisa pisortanit paasineqarneranit kingusinnerpaamik ullut 14-t ingerlanerini iliuuseqartoqartussanngorlugu.

Oqaluuserissani immikkoortut pingajuttut inuiaqatigiinni naligiinnginneq oqaluuserineqassaaq.

Inuit Ataqatigiit siulittaasuat Sara Olsvig, Nunatsinni naligiinnginnerup annertusiartuinnarneranut kisitsisitigut takussutissat ernumanartoqartillugit siunnersuuteqartuuvoq.

Inuiaqatigiinni iluaqutissat naapertuilluartumik nammaqatigiittumillu innuttaasut, kommunit aamma inoqarfiit akornanni agguataarnissaannik isummersorneq unitsinngisaannarlugu ingerlattuartariaqarparput, Olsvig allappoq, kisitsisillu Naatsorsueqqissaartarfimmeersut innersuussutigai,  nunanut avannarlernut allanut aamma EU-mi nunanut ataatsimut isigalugu sanilliullugu Nunatsinni naligiinnginnermik kisitsiliunneqarsimasut qaffasinnerpaajusut taakkunani takuneqarsinnaammat.

Ullormut oqaluuserisassat immikkoortuisa kingullersaattut Siumumeersup Vivian Motzfeldtip siunnersuutaa oqaluuserineqassaaq.

Taassuma danskit oqaasiinut taarsiullugit tuluit oqaasiisa pingaarnerit aappaattut Nunatsinni meeqqat atuarfianni atuartitsissutigineqartalernissaat siunnersuutigaa.

Tuluit oqaasii nunarsuarmioqatitsinnut pingaarnerpaatut attaveqaataapput, tuluillu oqaasiinik atuillualersinnaalernerup inuusuttut Danmarkip avataani nunani allani ingerlariaqqiuffiusumik ilinniagaqarnissaannik periarfissaqarnerutilissavai, Vivian Motzfeldt taama tunngavilersuivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat