Inatsisartuni ullormut pisussat
Siusinaartumik pensionisiat pillugit inatsimmut allannguutissatut siunnersuutit, Ilaqutariinnermut, Naligiissitaanermut Isumaginninnermullu Naalakkersuisumit Martha Lund Olsenimit saqqummiunneqassapput.
Siusinaartumik pensionisiallit ilatsiinnarluni pilersugaanermit sallinngortillugu sulisinnaassutsiminnik atorluaasinnaanissaat namminneerlutillu isertitaqarnissamut periarfissat kajumissuseqarnerullu nukittorsarnissaat pillugu kissaateqarneq siunnersuutip tunuliaqutaraa, Naalakkersuisut taama allaaserinnipput:
- Inuttaasut nukissaminnik pitsaanerpaamik atuinissamut periarfissinneqarnissaat taamatullu imminnut pilersorlutik atugaqarnissamut periarfissaqalernissaat Naalakkersuisut siunnersuutikkut kissaatigaat. Allannguutissatut siunnersuummi ilaatigut tamanna atuarneqarsinnaavoq.
Katersugaasiveqarneq pillugu inatsisip nutarterneqarnissaa pillugu Naalakkersuisut aamma siunnersuuteqarput, Ilinniartitaanermut, Kultureqarnermullu Naalakkersuisumit Nivi Olsenimit siunnersuut saqqummiunneqassaaq.
Allagaateqarfeqarneq pillugu inatsimmut allannguutissatut siunnersuut Nivi Olsenip aamma saqqummiukkumaarpaa, soorlu aamma Aalisarnermut Piniarnermullu Naalakkersuisoq Karl-Kristian Kruse siunnersuummik saqqummiussaqarumaartoq.
Aalisarneq pillugu inatsimmi allannguutissatut siunnersuutit taassuma saqqummiutissavai, inuussutissarsiutigalugu aalisarsinnaanermut akuersissutit tunniunneqartarnerannut ingerlaartarnerallu pillugit allannguutissatut siunnersuutit saqqummiunneqarumaarlutik.