Politikki

Ilisimasalik: Kinap Kalaallit Nunaanni ingerlataqalernissaanut USA ammaasseqataasinnaavoq

Pituffik pillugu Kalaallit Nunaannut iluaqutaanngitsumik USA isumaqatigiissusiornermigut imminut ajoqusiinnarpoq. USA-mmi nunami sakkutooqarfeqarneranut iluaqutissartaasut Kalaallit Nunaata qularutigilersinnaavai taarsiullugulu Kinamut isiginiarnerulerluni. Immikkut ilisimasalik Illersornissaq pillugu ilisimatusarfimmeersoq taama naliliivoq.

Allattoq Aviâja Kilime , Anton Gundersen Lihn

aggustip 30-at 2018 09:12

Nutserisoq Simon Uldum

Amerikamiut Pituffimmut aningaasartuutiminnik sipaarniuteqarnerat Kinamiunut Kalaallit Nunaannut qaaqqusissutitut isigineqarsinnaavoq, taamaattoqarneratigullu USA-p Kalaallit Nunaanni inissisimanini sanngiillisippaa, lektori illersornissamullu politikki pillugu immikkut ilisimasalik illersornissaq pillugu ilisimatusarfimmeersoq, Jon Rahbek-Clemmensen, KNR-imut oqarpoq.

Amerikamiut Pituffimmi kiffartuussinissamik ingerlatseqatigiiffimmut Amerikamiunit pigineqartumut Vectrus Services A/S-imut isumaqatigiissuteqarnerat nunatsinni pakatsissutigineqarpoq.

Isumaqatigiissummi annaaneqartoq nunatsinnut ukiumut 200 millionit koruunit tungaannut isertitsissutaasarnera siornatigut tagginneqarpoq.

Isumaqatigiissulli Amerikamiut iluarisimaarpaat, Pituffiummi ingerlanneqarneranut aningaasartuutigisartakkatik affaannanngortikkamikkit.

AAMMA ATUARUK 'America First' isumaqatigiinniarnernut nutaanut ajornakusoortitsisoq

USA-li aningaasanik sipaaruteqaraluarluni politikkikkut annaasaqaratarsinnaavoq, soorlu assersuutigalugu isumaqatigiinniarnissamut Amerikamiullu sakkutuuinik nunatsinniititaqarnissamut qanoq piumassuseqartiginera eqqarsaatigalugu.

USA-p Kalaallit Nunaanni inissisimanerminut tunngatillugu inuiaqatigiinnit kalaallinit tapersersorneqarnini taamaalillugu aamma millisippaa. Kalaallit Nunaannimi imminut aperisoqarsinnaammat: Pituffimmi sakkutooqarfik aningaasatigut iluaqutissartaqanngippat, taava sooq nunatsinniinnera akueriinnassavarput

Taamaattoqarneratigullu Kinap Kalaallit Nunaanni ingerlataqalernissaanut USA ammaasseqataasinnaasoq, Jon Rahbek-Clemmensenip oqaatigaa.

Kalaallimmi imminnut aperiinnarsinnaapput: USA-mit aningaasanik pissarsisinnaanngikkutta Washington piunnaarlugu Beijingimut saaginnassanerpugut?

AAMMA ATUARUK Vi forhandler stadig med amerikanerne om Pituffik

AAMMA ATUARUK Kiffartuussinissamik isumaqatigiissutip nutaap aningaasartuutivut affaannanngortippai