Pituffik: 'America First' isumaqatigiinniarnernut nutaanut ajornakusoortitsisoq
Tassalu Vivian Motzfeldt naapertorlugu nunarput Pituffimmi sullissinissaq pillugu USA-mik Danmarkimillu isumaqatigiinnialeruttorpoq, taakkuali ajornakusoortuusut, ilisimasallip Illersornissamut Ilisimatusarfimmeersup nalilerpaa.
Nunattami isumaqatigiissummit pissarsiaqarneruniassaguni, maanna killiffik attanneqarsinnaanngitsuusoq, amerikamiunut isumaqalersitsiniaasariqarpoq, Lektori issittumilu sillimaniarnermut ilisimasalik Illersornissamut Ilisimatusarfimmeersoq, Jon Rahbek-Clemmesen taama oqarpoq.
- Isumaqatigiissut massakkut atuuttoq siunissami ungasinnerusumi attannerqarsinnaanngitsoq, Kalaallit Nunaata Danmarkillu Amerikamiunik isumaqalersitsiniaaniarlutik suliarujussuaqarput. Isumaqatigiissut siunissamut ungasinnerusumut attanneqarsinnaassappat peqataasut tamarmik pissarsissutigisariaqarpaat, immikkut ilisimasalik oqarpoq.
USA-mili pissutsit taamaatsillugit amerikamiut qularunnaarsinnissaat ajornakusoorpoq.
Tassami USA-mi atorfillit politikerillu tamarmik amerikamiut siulliullugit sullinnissaat pingaartittorujussuuaat.
- Aallartitap soorlu oqarneratuut: "America salliutillugu". Pissutsit taamaatsillugit, apeqqummi uani immaqa akuersaarnerulaartariqarnerannik, USA-mut nassuiaanissaq ajornakusoortorujussuussaaq, Jon Rahbek-Clemmesen oqarpoq.