Vivian: Isumaqatigiinniarnerit suli ingerlapput

Nunanut allanut naalakkersuisup Vivian Motzfeldtip isumaqatigiinniarnerit killiffiat pillugu erseqqissumik oqaaseqarnissani mianersuuppaa, USA-mulli suli isumaqatigiinniarnertik erseqqissarlugu.

- Isumaqarpungalu siusippallaartoq oqariartuutigissallugu isumaqatiginninniarnerit ingerlanerini imatut imatut pisoqassagaluarpat taava qanoq iliortoqassava. Isumaqarpunga pingaarutilerujussuusoq oqaatigissallugu nunatut aamma isumaqatiginninniarnerit ingerlasut massakkut aamma immikkut mianerisassaammata. Tassanilu suliat ingerlanneqartut taakkulu aamma qanoq naammassiumaarnissaat soorunami utaqqineqarput, kisianni aamma piffissaq sivisooq ingerlareerpoq taamaammat aamma piumasaqaatit uagutsinninngaanniit uteqqiattumik, naalakkersuisut allanngorartumik nikeraraluarneranilluunniit, oqariartuut ataasiusoq nunatsinninngaanniit oqaatigineqaqattaaginnaavippoq.

Kiffartuussinissamillu isumaqatigiissutip nutaap Amerikami akileraartartunut ukiut tamaasa sipaaruteqarfiusalertoq, Carla Sandsip KNR-imut oqaatigereeraalu Vivian Motzfeldt taama oqarpoq.

Amerikamiunummi sipaaruteqarnissaq pingaaruteqarpoq.

AAMMA ATUARUK Kiffartuussinissamik isumaqatigiissutip nutaap aningaasartuutivut affaannanngortippai

- Præsident Trumpip anguniagaa tassaavoq America First (Amerika salliutillugu, aaqq.) - imaanngitsoq Amerika Only (Amerika kisiat, aaqq.). Tamannalu pissutigalugu amerikami naalakkersuisut amerikamiut, taakkulu atugaat, salliuttussaavaat. Tamanna amerikamiunut suliffinnik pilersitsinissamik amerikamiullu akileraartartuisa aningaasaataannik sipaarniarnissamik isumaqarpoq, aningaasammi pineqartut tamatsinneersuupput (amerikamiut, aaqq.). Nutaamik isumaqatigiissuteqartoqarneratigut Amerikami innuttaasut dollarserpassuarnik sipaaruteqarpoq, aamma isumaqatigiissuteqarneq inatsisit naapertorlugit pivoq, Carla Sands oqarpoq.

Amerikamiullu taamatut isiginninnerat kalaallit Pituffimmit isertitaqarnerujumallutik nutaamik isumaqatigiinniarneranni unammillernartuussaq.

Tamannalu pillugu Vivian Motzfeldt ima oqarpoq:

- Soorunami taakku isaanninngaanniit oqariartorneq taannaavoq, uangalu aamma isinninngaanniit, immaqaluunniit uagut tungitsinninngaanniit, oqariartuutit aamma allaapput. Uanilu aamma eqqaamaneqartariaqartoq tassaavoq Amerikamiinnginnatta nunarput pineqarmat, naalakkersuisoq oqarpoq nangillunilu:

- Tassa isumaqatiginninniarnermi nunarput peqataavoq kunngeqarfik Danmark peqatigalugu, tassanilu aamma isumaqatiginninniarnerit suli ingerlapput. Aammalu piffissani akulikitsuni oqariartuutit nunatta pingaartitai oqariartuutigineqaqattaartarput.