Niviaq Korneliussen: Imminut toquttarneq isiginngitsuusaaginnarneqarsinnaanngilaq
Kisitsisillu naapertorlugit Nunatsinni imminut toqussimasut nalunaarsorneqarneri ikigisassaanngillat.
Siornami inuit 41-t imminut toqussimasut politiit ukiormoortumik nalunaarusiaanni nalunaarutigineqarsimapput, taakku saniatigut imminut toqunnissaminnik sioorasaarisimasut siorna 832-upput. Nunarput ukiorpanngortuni nunarsuarmioqatitsinnut sanilliukkaanni inuttussuseq aallaavigalugu nunatsinni imminut toquttartut amerlanerpaat ilaanniipput.
Tamannali imminut toquttarnermut nammineq piumassutsiminik immikkut iliuuseqarniartup, atuakkiortup Niviaq Korneliussenip aamma isiginngitsuusaaginnarusunngilaa:
- Ukiorpakuluut pisariaqarnikuuvoq, ukiorpakuluut ingerlaneranni nunarsuarmi inuttussuseq aallaavigalugu maani nunatsinni imminortartut amerlanerpaapput, ukiorpassuarni aamma taamaanikuuvoq. Immaqa inuiattut oqarsinnaavugut tamangajatta imminornikumik ilisarisimasaqarluta. Taanna tusaanngitsuusaaginnarsinnaanngilarput taamaammat nukissallit kajumissaarusunnaqaat aamma suleqataanissaannik.
Oqarasuaatikkut siunnersuineq
Imminut toqunnissamik eqqarsaateqaraanni imaluunniit imminut toquttoqarneranik misigisaqarsimagaanni oqarasuaatikkut siunnersortinnissaq nunatsinni periarfissaavoq.
Inersimasut Attavimmut oqarasuaatikkut normumut 146-mut sianersinnaapput.
Meeqqat inuusuttullu Meeqqanut-Inuusuttunullu- Oqarasuaammut normumut 134-mut sianersinnaapput.
Oqarasuaatit taakku ullut tamaasa ammasarput nal. 19.00-imit 21.00-imut.
Akerliussutsimik takutitsissapput
Nunatsinni imminut toqunnissamut eqqarsaateqartunut tungatillugu suliniutit arlaqarput, soorlu inuuneruna iggoraarsuk, paarisa assigisaallu. Taakkuli naammaqqajanngitsut Niviaq Korneliussen oqarpoq, taamaammat suliniummi aallartitseqataaffimmini aamma nittartakkakkut facebookkimi soqutigisaqaqatigiit pilersitsipput Imminornerit 0 selvmord.
- Isigiinnarsinnaannginnama taava nukissakka tamaasa atorlugit arlaatigut allanngueqataalaarsinnaannissamik kissaateqarlunga aallartitsinikuuvunga.
Imminornerit 0 selvmord akerliussutsimik takutitsinissamut piareersarlutik allagartassualiortut Qanoruumiit alakkarterparput.
Niviaq Korneliussenip nunatsinni illoqarfiit suliniuteqartut suleqatiserai. Maannamut illoqarfiit qulit marlunngorpat akerliussutsimik takutitsisoqarnissaanut aaqqissuusseqataaffigai.
Akerliussutsimik takutitsinissamut aaqqisueqataasup Inatsisartunut akerliussutsimi takutitsinissaminnik qulequttanik pingasunik anngusserusullutik oqaatigaa, siullertut imminut toqukkusuttut imminullu toqunnikut qanigisaasa pilertortumik ikiorserneqatalernissaat, aappaattut amingaasarpassuit atorlugit imminortarnerit akiorneqarniarnissaat piumasaraat kiisalu:
- taavalu pingajuattut politikkerit, soorunalimi aamma inuiaqatigiit kisianni politikkerit arlaatigut iluaqutaasinnaasumik iliuuseqartariaqarlerput, akerliussutsimik takutitsinissamut nammineq kajumissutsiminik suliniuteqartoq, Niviaq Korneliussen KNR-mut taama oqarpoq.
AAMMA ATUARUK Imminut toqunnissamik sioorasaarinerit amerlavallaartut
Marlunngorneq oktobarip 30-ani nalunaaqutaq ullup-qeqqanut Nuummi iliveqarfitoqqami Noorlerniittumi akerliussutsimik takutitsineq aallartissaaq, tassanngaaniit Inatsisartut ataatsimiittarfiata silataanut pisoqatigiittoqassaaq.
Nakuusa akerliussutsimik takutitseqataarusullutik nalunaartuteqartut aamma uani takusinnaavatit:
