Immikkut ittumik katersornissaq piumasaraa
Siumup inatsisartunut ilaasortaatitaasa taamaalillutik Inatsisartut ataatsimiigiaqquneqarnissaat, Inatsisartut Siulittaasoqarfiannut piumasariniarlugu, ataatsimoorlutik tusagassiorfinnut nalunaaruteqarput.
Tassami Siumut isumaqarpoq, aatsitassarsiornermut atatillugu Naalakkersuisut piumasaqaataat sakkukippallaartut, aatsitassarsiortoqarneranimi, sulisut akileraarutaat pingaartinnerullugit aningaasarsiutiginiarneqarmata.
Illuatungiliuttut patiiata taassuma piumaneruaa, aatsitassarsiortitseqatigiiffiit piiaanernut sunulluunniit nunatta karsianut akilersuutissanik akiliisassasut. Tassa procentimik aalajangersimasumik, kaaviiaartinneqartut aallaavigalugit akiliisoqartarnissaa piumasariniarneqarluni.
Taamatut sakkortunerusunik piumasaqaateqarnikkut, aatsitassarsiortitseqatigiiffiit iluanaarutigisinnaasamik akileraaruserneqarnerisigut, aningaasartuutigeqisaminnik misissueqqissaarnissanut aatsitassarsiornermillu aallartitsinissaminnut tunuarsimaanerulernissaat, Naalakkersuisunit siusinnerusukkulli mianersoqqussutigineqareerpoq.
Inatsisartut immikkut ittumik ataatsimiigiaqquneqarnissaannik Siumup piumasaqaataa, qanoq isumaqarfigineqarnersoq paasiniassavarput. Tamanna ullup sinnerani paasisaqarfigisinnaassavarput.
