Immikkut ittumik katersornissaq IAp akerleraa
Siumup Inatsisartuni ilaasortaasa piumasaraat, suliffissuit aatsitassanik qalluiniartut annertunerusumik akileraaruserneqartassasut, Nunarpullu sinneqartoorutinik amerlanernik pissarsisariaqartoq aammalu suliffissuit CO2-mik aniatitsinerminni akileraaruserneqartassasut. Tamakku pillugit Siumut isumaqarpoq, Inatsisartut upernaakkut ataatsimiinnissaat sioqqullugu pisariaqartoq. Aprilip 13-anni Inatsisartut upernaakkut ataatsimiinnissaat aallartittussaavoq.
Inatsisartuni Inuit Ataqatigiit ilaasortaat sinnerlugit, Olga P. Berthelsen aamma Naaja Nathanielsen qisuariarlutik allapput, immikkut ittumik katersornissaq pisariaqanngitsoq aammalu taamaattoqassappat tamanna inuiaqatigiinnut akisuallaassasoq.
- Inuit Ataqatigiit immikkut ittumik ataatsimiinnissamut akuersissagaluarpata, aatsaat pisariaqavissorigutsigu akuersisinnaavugut. Taamaattoqanngilarli! Oqaluuserisassanik siunnersuutinut nassiussisinnaaneq suli qaangiutinngilaq, tamanna Siumukkut atorsinnaakutsoorpaat, Inatsisartuni ilaasortat Inuit Ataqatigiit taama allapput.
Taakku ilanngullugu oqaatigaat, Siumukkut maanna siunnersuutaat siusinnerusukkut nalunaaruteqarnerannut sanilliullugu isummamik allanngortitsinerusoq.
- Aatsitassat pillugit inatsit Siumukkut ajunngitsutut isigiuarsimavaat, allaat Inatsisartuni oqaluttarfik atorlugu oqaatigalugu aatsitassarsiorneq aqaguluunniit aallartikkaluarpat ajoriffissaqartinnagu, Olga P. Berthelsen aamma Naaja Nathanielsen allapput nangillutillu.
- Maannakkut kingusinaarpasillutik Siumukkut itilernerat inuiaqatigiinnut aningaasartuutaasariaqanngilaq. Tamanna akisussaassuseqannginnermik takutitsineruinnarpoq, Inatsisartuni Inuit Ataqatigiit ilaasortaat allapput.
