Vivian Motzfeldt sakkutuut umiarsuaat nungullarnikut pillugit: Immikkut ilisimasallit tusassallugit pingaarpoq
Sakkutuut imarsiortut alapernarsuutaat sisamat Thetis, Triton, Hvidbjørnen aamma Vædderen, ilaatigut Kalaallit Nunaata imartaani suliassanik ingerlatsisartut, immikkut ilisimasalinnit taaneqarput nungullarsimasut sakkutuutullu suliassatik naammassisinnaangikkaat.
Qaammat kingulleq siornatigut kontreadmiraliusimasut marluk aamma nalilerpaat nunat assigiinngitsut akornanni illersoqatigiinnissamut ilaassallutik umiarsuit NATO-p minnerpaamik piumasaqaataanik naammassinnissinnaanngitsut.
Naallu umiarsuit pisoqalisut politikikkut maani suli oqallisaanngikkaluartut nunanut allanut naalakkersuisoq Vivian Motzfeldt (S) oqallinnermut malinnaavoq.
- Politikikkut suli oqallisiginngilarput, kisianni isumaqarpunga pingaaqisoq umiarsuit suliassaminnut naleqqunnersut pillugu oqallinneq malinnaaffigissallugu. Aamma immikkut ilisimassallit siunnersuutaat isumaallu tusassallugit pingaaruteqarpoq.
Vivian Motzfeldt umiarsuit qanorpiaq inneri pillugit massakkut oqaaseqarnianngilaq, kisianni oqaluttuarpoq illersornissamut atortut ukiumi nutaami Danmarkimi illersornissaqarfik isumaqatigiinniutaalerpat pingaaruteqartutut oqallisigineqassasut.
- Tikkkuaruminaappoq pingaarnersiuinermi umiarsuit allanut naleqqiullugit pingaarnerutinneqassanersut. Nunatarujussuaq imartarujussuarlu uani pineqarpoq aammalu ullumikkut nunarsuarmi pissutsit eqqarsaatigalugit isumannaannissamut piumasaqaatit naammassisussaavavut.
- Nunarsuarmi qanoq pisoqarnersoq qanorlu sunniuteqassanersoq malinnaaffigisariaqarparput. Kisianni aamma eqqaamassavarput issittumi sorsuttoqanngimmat. Politikkikkullu akisussaaffigaarput qulakkiissallugu tamanna ingerlaannassasoq.
Isumaqatigiinniarnernut ilaassaaq
Illersornissaqarfimmmmit allagartat uppernarsaatit isertugaagaluit kalerriussat siornatigut takutinnikuuaat Illersornissaqarfiup pisortaqarfiani kissaatigineqartoq umiarsuit alapernaarsuutit sivisunerusumik atasinnaanerat kissaatigineqartoq, issittumi suli ukiuni 15-ini atorneqarsinnaalerlutik. Saniatigutillu aatsaat 2031-2037-mi aningaasat immikkoortillugit umiarsuarnik nutaanik ilusiliinissamut sanaartornissamullu.
Kisianni Inatsisartunut ilaasortamit Najaaraq Møller-imit (S) apeqqummut akissummini naalakkersuisup erseqqissarpaa tamanna politikikkut akuerisamik pilersaarutaanngitsoq.
- Naalagaaffinngornissamut Nunanullu allanut Naalakkersuisoqarfik paasissutissat kalerriussat pillugit Illersornissamut ministereqarfimmik oqaloqateqarpoq. Tassunga atatillugu Illersornissamut ministereqarfik erseqqissaavoq aningaasaliinissamut pilersaarut tassaasoq missingersuut danskit naalakkersuisuinit akuerisaanngitsoq taamaattumillu danskit naalakkersuisuisa issittumi piginnaasaqarnissaq pillugu illersornissamut isumaqatiginninniutissamut inaarutaasumik oqallissaarutiginngikkaat, akissummini allappoq.