Immikkut ilisimasalik: Politikerit soraarsitsinerup tunngavia oqaatigisinnaavaat
KNR-ip, Danmarkimi paasissutissiinermut ingerlatsinissamullu immikkut ilisimasalik, Oluf Jørgensenimut tamanna pillugu paasiniaagami, eqqumiiginerarpaa politikerit innuttaasunut soraarsitsinerup tunngavianik oqaaseqarumannginnerat.
KNR arlaleriarluni atorfillit qullersaanik oqaaseqartitsiniaqattaaraluarami, ippassaani Svend Hardenberg Naalakkersuisut siulittaasuata Naalakkersuinermut pisortaatut, sooq tunuartinneqarneqarnersoq paasiniaraluaramikku iluatsinngilaat.
Namminersorlutik Oqartussat tunuartitsinerup tunngavia avammut oqaatigissallugu inatsisitigut pisussaaffeqanngitsut,
Danmarkimi tusagassiornermut ilinniarfiup, paasissutissiinermut ingerlatsinermullu inatsisilerinermut tunngasunut immikkoortortaqarfiani ukiorpassuani pisortaasimasoq, Oluf Jørgensen oqarpoq.
Aamma atuaruk Hardenberg naalakkersuisoqarfiup pisortaatut atorfimminit tunuartinneqarpoq
Aammalu oqaatigaa politikkikkut pisortat nipangiussisussaatitaanngitsut, taamaattumik soraarsitsinerup peqqutaanik, soorlu atorfimmut tunngasumik naammaginanngitsumik sulisoqarsimassappat avammut oqaaseqarsinnaasut.
-Eqqumiiginarpoq politikkerinut aqutsisut atorfimmi qaffasissumi tunuartitsisoqartillugu tunngaviusoq pillugu nassuiaateqarusunnginnerat, Oluf Jørgensen oqarpoq
Aammalu oqaatigaa:
-Inuiaqatigiinnut kalaallinut pingaaruteqaraluarpoq taamatut pisoqarneqatigut suut tunuliaqutaanersut ilisimatitsissutigineqarnissaat, aamma politikkerit pisinnaatitaapput inatsisitigulli pisussaaffeqanngillat, paasissutissiinermut ingerlatsinermullu inatsisilerinermut tunngasunik immikkut ilisimasalik, Oluf Jørgensen oqarpoq.
Kisianni soraarsitsineq oqaaseqarfiginiarnagu aaliagersimallutik, Naalakkersuisut siulittaasuat Kim Kielsen KNR-mut oqarpoq.
