Immikkoortortaqarfiit nukittorsarniarpaat
Inatsisartunut qinersisoqarnissaanik kingusinnerpaamik ukiut marluk qaangiuppata nalunaaruteqartoqartussaavoq, Siumullu naalakkersuisuutitaqaleqqinnissaanik suliaqartussat arfininngormat qinerneqarput.
2013-imilu qinersinermi ajorsartoqaqqissanngippat siulersuisuunerit nutaat qanoq iliuuseqarniarpat?
Siumup aaqqissuussaneranut akisussaalluni siulittaasup tulliata, Vittus Qujaukitsup, Siumup aaqqissugaanera nukittorsarneqartariaqartoq oqaatigaa:
- Ajornartorsiuterput aaqqissuussaanitta nukittorsarneqarnissaanik aallaaveqarpoq. Najugaqarfinni inoqarfinni tamani Siumup ersarinnerunissaa amigaatigineqarpoq, Siumup aaqqissuussaneranut akisussaalluni siulittaasup tullia, Vittus Qujaukitsoq oqarpoq.
Siumup Inuussuttunut Suleqatigiiffiani siulittaasuusimasoq Benjamin Kielsen Siumup siulersuisuunerinut aamma qinigaavoq.
Siumup suleriaatsimigut nutarternissaa, taassuma kissaatigaa, ilaasortallu Siumup aaqqissugaaneranut akuunerulernissaat aamma kissaatigalugu:
- Siumup suleriaatsimigut siunissami qaninnermi nutarternissaa eqqaaneqarpoq. Ilaasortavut qanoq ililluta peqataatinnerusinnaavavut? Taakkualu suliniuteqarnerat tusagassiuutinut saqqummersissinnaavavut? Tamakku ilaatigut eqqartorneqarput, Benjamin Kielsen, Siumup siulersuisuunerinut ilaasortaq oqarpoq.
Siumup ullumikkut aaqqissugaanera pissutaalluni kingullermik qinersisoqarmat ajorsarnermut pissutaava?
Vittus Qujaukitsoq ima akivoq:
- Pitsanngoriarfissanik inissaqarpoq. Tamanna aamma kingullermik qinersisoqarneratigut takuneqarsinnaavoq, siusinnerusukkut qinersinerni angusarisarsimasatsinniit appasinnerulaartumik inissisimaleratta, Siumup aaqqissuussaneranut akisussaalluni siulittaasup tullia, Vittus Qujaukitsoq oqarpoq.