Godthåb Bryghus: Immiaaraliorfiuteqartut eqqugaassapput

Imigassat aalakoornartortallit nittarsaanneqartarnerat killilersugaalerpat tamanna Nunatsinni immiaaqqanik tunisassiorfiit tunisaqarniarnerannut akornusiissasoq, Godthåb Bryghus isumaqarpoq. Killilersuinissarlu immikkoortitsinerusoq, Nuuk Imeq isumaqarpoq.
septembarip 05-at 2016 13:10

Neriniartarfiup Godthåb Bryghusip immiaaqqanik tuniniaanini ilaatigut nittartakkatigut Facebookikkut, Nuuk Ugeaviisikkullu annertusaavigisarpaa.

Innuttaasulli peqqissuunerunissaat anguniarlugu peqqissutsimut naalakkersuisup siunnersuutigaa imigassat aalakoornartortallit Nunatsinni nittarsaanneqartarnerat killilersugaalissasoq.

Aamma atuaruk Politiit: Imerniartarfiit ammanerusalerpata eqqissisimanarnerulissaaq

Imerniartarfiutillilli naalakkersuisup siunnersuutaanut akuersaarpallaanngillat.

Inatsisissatummi siunnersuut Nunatsinni immiaaraliorfiuteqartunut, suliffeqarfissuarnut tunisaqarluartartunut unammillereersunut, annertuumik akornusiissaaq.

Aamma atuaruk Imigassat aalakoornartullit ammasarneri sivitsorneqariaannaavoq

- Siunnersuut akuerineqassappat Nunatsinni immiaaraliorfiuteqartut akornuserneqassapput, tuniniaanikkummi annertusaaniarnerat killilersugaalissaaq, Godthåb Bryghusimi pisortaaneq Nicolai Nissen oqarpoq, nangillunilu:

- Suliffeqarfissuilli nunanit allaneersut, soorlu assersuutigalugit Tuborg Carlsbergilu TV-kkut nittartakkatigullu killeqanngitsumik nittarsaassiinnarsinnaasut tamakkumi nittartakkatigut tv-kullu aallakaatitsinerni inatsitigut akuleruffigisinnaanngisatsinni maani aamma nittarsaassisarnitik ingerlatiinnartussaassavaat.

Iluaqutaanavianngitsoq

Nuuk Imeq siunnersuummut aamma isorinnippoq, "inerteqqut Kalaallit Nunaanni tusagassiuutinuinnaq saaffiginnittoq eqqarsaatersuutigilluagaanngitsoq"-mik taallugu.

Aamma atuaruk Steen Lynge: Tunumi aalakoornartulinnik tuniniaaneq unikkallarli

Nunatsinni immiaaraliorfiuteqartut nittarsaasseqqusaajunnaarnerat imigassamik aalakoornartulimmik atuinermik annikilliliinavianngitsoq, Nuuk Imeq isumaqarpoq.

- Ussassaarinermut inerteqquteqarneq iluaqutaanavianngilaq, tassami Kalaallit Nunaanni TV-kkut aallakaatinneqartartut amerlanersaat nunanit allaneersuummata, isiginnaarneqarnerpaasartullu tv-kkut ussassaarutigisartagaat imigassartaqartarmata, Nuuk Imermi pisortaaneq Bernhard Christensen, tusarniaanermut akissuteqarluni taama allappoq.