Politiit: Imerniartarfiit ammanerusalerpata eqqissisimanarnerulissaaq

Imerniartarfiit sivisunerusumik ammasalissagunik unnukkut eqqissisimasoqarnerulersinnaasoq, politiit isumaqarput.
Imerniartarfiit ullaassakkut tallimat tungaanut ammasalernissaat, peqqissutsimut naalakkersuisup siunnersuutigaa.
Tamannalu isumarsarsiatsialaasinnaasoq, Kalaallit Nunaanni politiini politimesteri, Bjørn Tegner Bay isumaqarpoq.

- Imerniartarfinnit ullaassakkut nalunaaqutaq pingasut tallimallu akornanni ataatsikkut aniasoqartarunnaassappat, inuit eqqissisimanerulernissaat neriuutigaarput. Imerniartarfiimmi matugaangata inuit ataatsikkoorlutik maannakkut aniasarput, Bjørn Tegner Bay oqarpoq.

Najugaqarfinnilu fiisterlutit nangikkiarnerit ikinnerulernissaat politimesterip aamma neriuutigaa.

Aamma atuaruk: imerniartarfiit-sivisunerusumik-ammasalernissaat-imerniartarfiutillit

- Fiisterlutik nangikkiartortoqartillugu aalakoorpallaartoqartillugulu persuttaasarnerit kinguaassiuutitigullu atornerluinerit ajornartorsiutaasorujussuusut maluginiartarpagut, Bjørn Tegner Bay oqarpoq.

Imerniartarfiutillilli Naalakkersuisut siunnersuutaannut akuersaarpallaanngillat. Imernerniartarfiit sivisunerusumik ammasalissappata najugaqarfinnut nangikkiarnerit ikilinatik kingusinnerusukkut aallartiinnartarnissaat, GE-mi akunnittarfinnut neriniartarfinnullu tunngasunut siulittaasup Helge Tangip ernummatigaa. 

Aamma atuaruk: imigassat-aalakoornartullit-ammasarneri-sivitsorneqariaannaavoq

Taamaattoqaratarsinnaasorlu Bjørn Tegner Bayip oqaatigaa. Inuilli ullaassakkut pingasut tallimallu akornanni innariartortartut amerlanerulissasut politimesterip ilimagaa.

- Najugaqarfinnut nangikkiartut ikinnerulernissaannut tamanna periarfissaalluarsoraarput. Ernumanartorli ilumoorpoq, misilinngikkutsiguli iluaqutaassanersorlu takunagu ajuusaarnassasoq isumaqarpugut, Bjørn Tegner Bay oqarpoq.